काठमाडौं (हाम्रो खेलकुद)– राष्ट्रिय पुनर्निर्माण प्राधिकरणले नेपाली राष्ट्रिय क्रिकेट टोलीका कप्तान पारस खड्का राष्ट्रिय स्वयम सेवक नेपालको सद्भावना दूतमा नियुक्त गरेको छ । भूकम्पपछिको पुनर्निर्माणका लागि स्वयम सेवक युवाहरुलाई सक्रिय बनाउन राष्ट्रिय पुनर्निर्माण प्राधिकरणले स्वयम सेवक नेपाल गठन गरेको थियो ।
प्राधिकरणले भूकम्पपछिको पुनर्निर्माण तथा पुनर्वासमा सहयोगका लागि एक लाख स्वयमसेवक युवाहरुको सञ्जाल विस्तार गर्ने उद्देश्यका साथ पारसलाई सद्भावन दूत नियुक्त गरिएको प्राधिकरणले जनाएको छ । बुधबार प्राधिकरणका प्रमुख कार्यकारी अधिकृत (सिइओ) डा. गोविन्द पोखरेलले पारसलाई सद्भावना दूतको पत्र हस्तान्तरण गरेका थिए ।
कप्तानले पुनर्निर्माण अभियानको हिस्सा बन्न पाएकोमा गौरव महसुस भएको जनाउँदै भने,‘सन् २०२० सम्ममा एकलाख युवालाई यो अभियानमा समट्ने र २० हजार युवा कुनै पनि आपत विपत्तका लागि तयारी अवस्थामा राखिने सोच उत्साहजनक छ । यसमालाई पनि समावेश गराएकोमा धन्यवाद दिन चाहन्छु । म आफ्नो ठाँउबाट सम्भव भएसम्म सहयोग गर्नेछु । हामीले जुन पार्टीको आएपनि सरकारलाई नै सहयोग गर्ने हो ।’
पेटमा समस्यापछि पारस अहिले आराम गरिरहेका छन् । उनको नेतृत्वमा नेपालले फागुन २८ र ३० गते विश्व क्रिकेट लिग च्याम्पियनसिपअन्तर्गत केन्याविरुद्ध कीर्तिपुरमा दुई खेल खेल्नेछ । पारस आराम गरिरहेका छन् भने क्रिकेट टोली अन्तिम अभ्यासका लागि अहिले भारत भ्रमणमा छ ।
गत बर्ष वैशाख १२ मा गएको विनाशकारी भूकम्पबाट ध्वस्त भएका भौतिक संरचना पुनर्निर्माणलाई चुस्त बनाउन युवाको उत्साहलाई सदुपयोग गर्ने उद्देश्यका साथ पारसलाई सद्भावना दूत बनाइएको प्राधिकरणका सिइओ पोखरेलले बताए । पोखरेलले युवाहरुलाई यो अभियानमा जुट्न आग्रह गरे । राष्ट्रिय स्वयमसेवक नेपालले नेपाली युवाहरुलाई स्वयमसेवाप्रति आकर्षित गर्दै देशमा आइपर्ने विभिन्न प्रकोपका बेला पीडितहरुलाई सहयोग गर्न खटिदै आएको छ ।
