दिपक न्यौपाने
बुटवल – देशभक्त भैरव एफसी सैनामैना गोल्डकप फुटबल प्रतियोगिताको सेमिफाइनलमा पुगेको छ । साविक विजेता बुटवलको गोर्खा ब्वाइज क्लबलाई सोमबार २–० ले हराउँदै नवलपरासीको देशभक्तले अन्तिम चारको यात्रा पक्का गरेको हो । दुवै गोल रामबहादुर थापाले गरेका थिए ।
देशभक्त भैरव एफसीका खेलाडी । तस्बिर- दिपक न्यौपाने
२५ औं मिनेट रामले पेनाल्टी बक्स बाहिरबाट गरेको प्रहार सोझै गोलमा परिणत भएको थियो । उनले एकल प्रयासमा अर्को गोल ६१ औं मिनेटमा थपे । राम खेलको म्यान अफ दी म्याच समेत बनेका छन् ।
जनप्रिय स्पोर्टस क्लब देवापारको आयोजनामा रुपन्देहीको सैनामैना वडा नं ७ मा सञ्चालित प्रतियोगितामा मंगलबारको क्वार्टरफाइनलमा कपिलबस्तु जिल्ला फुटबल संघ र फर्साटिकर युवा क्लबबीच प्रतिस्पर्धा हुनेछ ।
सैनामैना नगरपालीकाको संरक्षणमा सन्चालन जारी प्रतियोगिताको विजेताले १ लाख १७ हजार तथा दोस्रो हुने टोलीले ५८ हजार रुपैयाँ प्राप्त गर्नेछन् । सेमिफाइनलमा पराजित हुने दुई टोलीले समान १२ हजार रुपैयाँ प्राप्त गर्नेछन् ।
