काठमाडौं (हाम्रो खेलकुद) – सातौं राष्ट्रिय खेलकुद प्रतियोगिता सुरु हुनु अगावै राष्ट्रिय खेलकुद परिषद् (राखेप) का सदस्यसचिव केशव कुमार विष्टले स्वर्ण विजेता खेलाडीलाई जनही १५ हजार रुपैयाँ पुरस्कारको घोषणा गरेका थिए । तर, सातौै सकिएको पाँच महिना पुरा हुदा पनि सदस्य सचिवले दिने भनेको पुरस्कार खेलाडीले अझै पाउन सकेको छैन । 

सातौंका क्रममा मात्र होइन, दुई बर्षअघि राखेप सदस्यसचिव पदको सपथ ग्रहणका क्रममा विष्टले खेलकुदमा स्वर्ण युग ल्याउने र खेलाडीको सेवा सुविधालाई आफुले पहिलो प्राथमितामा राख्ने बताएका थिए । सँधै मिठा र गुलिया भाषण गर्ने बानी परेका बिष्टले आइतबार नेपाल राष्ट्रिय तथा अन्तर्राष्ट्रिय खेलाडी संघले खेलकुद सुधारका लागि ध्यानाकर्षण गराउन आयोजना गरेको पत्रकार सम्मेलनमा पुरानै कुरा दोहो¥याए । उनले सातौमा स्वर्ण जित्ने खेलाडीलाई दिने भनेको पुरस्कार राशि एक हप्ता भित्रै उपलब्ध गराउने जिकिर गरे । उनले बजेट निकासमा केही ढिलाई हुदा खेलाडीलाई दिने भनेको रकम समयमै दिन नसकेको बताउदै अब यस्तो किसिमको ढिलाई नहुने प्रतिबद्धता व्यक्त गरे । जुन खेलाडीहरुले दुई वर्षअघि बाटै सुन्दै आएको कुरा हो ।

यता, खेलाडी संघका अध्यक्ष दिपक श्रेष्ठले खेलाडी तथा प्रशिक्षकलाई आवश्यक सुविधा नदिए राष्ट्रिय खेलकुद परिषदका सदस्यसचिव केशव कुमार विष्टको स्वर्णिम काल पूरा नहुने बताए । पूर्वाञ्चलमा पाँच महिनाअघि सकिएको सातौ राष्ट्रिय खेलकुद प्रतियोगितामा स्वर्णपदक जित्ने खेलाडीलाई दिने भनेको पुरस्कार अझै नपाएको सन्दर्भ कोट्याउदै उनको मासको अघि खेलाडी तथा पदाधिकारीलाई अनेक आश्वासन दिने र समय आउदा पन्छिन खोज्ने परिवृत्तिले सदस्य सचिवले भने जस्तो स्वर्णिम काल पुरा नहुने समेत बताए । ‘सदस्यसचिवले खेल दौरान नै स्वर्णपदक जित्ने खेलाडीलाई तत्काल १५ हजार र ७ हजार दिने निर्णयले खेलाडीहरु उत्साहित भएका थिए ।

तर, प्रतिायोगिता भएको पाँच महिना नाघिसक्दा पनि खेलाडीले पुरस्कार रकम पाउन सकेको छैन ।’ अध्यक्ष श्रेष्ठले भने, ‘सदस्य सचिव विष्टकै कार्यकालमा खेलाडीले पहिलोपटक स्वर्णसहित नगद पुरस्कार पाउने कुराले खेलाडी उत्साहित थिए । तर, त्यो उत्साह पाँच महिना बितिसक्दा मरेको छ ।’ यस्तै श्रेष्ठले सदस्यसचिवले दिन्छु भनिसकेको र खेलाडीले जितेर पाइसकेको पुरस्कार रकमको लागि कति दिन सम्म लड्नुपर्ने जिज्ञासा राखे । यस्तै श्रेष्ठले सदस्य सचिवको आजको आश्वासन आश्वासनमै सीमित रहने बताए । ‘अझै पनि हामीलाई सदस्यसचिवको आश्वासनमा कुनै विशवास लागेको छैन ।’ श्रेष्ठले भने, ‘सदस्यसचिवले एक हप्ताभित्र पुरस्कार रकम दिने बाँचा गर्नुभएको छ । आशा गरौं यसपटक केही हुन्छ कि ।’

यता खेलाडी संघका पुर्व अध्यक्ष तथा कीर्तिमानी ओलम्पियन दिपक विष्टले सम्मान तथा पुरस्कार सम्मानित तरिकाले पाउनुपर्ने बताए । खेलाडी संघले सदस्यसचिवलाई बुझाएको चारबुदे ध्यानाकर्षण पत्रमा सातौ राष्ट्रिय खेलकुदमा स्वर्णपदक जित्ने खेलाडीलाई जनही १५ हजार र ७ हजार तत्काल उपलब्ध गराउनुपर्ने माग राखेको छ । यस्तै मध्यपश्चिममा हुने आठौं राष्ट्रिय खेलकुद सातौमा जस्तो पूर्वाधार अभावमा नहोस् भन्नका लागि तत्काल तयारी थाल्न सम्बन्धित निकायलाई ध्यानाकर्षण गराएको छ ।

नेपालले आयोजना अधिकार पाएको १३ औं सागको तयारीको कुनै काम नभएको भन्दै यसलाई यथासिघ्र तयारी थाल्न र प्रतियोगिता निर्धारित समयमै नभए एक पुस्ताका खेलाडी नै पलायन हुने खतरा रहेकाले नेपाल आफैले सुरु गरेको प्रतियागिता निर्धारित समयमै गर्न माग गरेको छ । राखेपबाट २०७४ सालमा खेल र खेलाडीको लागि तय गरेको कार्यक्र अबिलम्ब सार्वजनिक गर्न माग गरेको छ ।