अर्जुन कार्की
बागलुङ – बागलुङ जिल्ला लिगको पहिलो दिन मंगलबार चिल्ड्रेन लाइफ स्पोर्टस् क्लब र रुद्र्रेपिपल युवा क्लब विजयी भएका छन् । उद्घाटन खेलमा चिल्ड्रेन लाइफले बागलुङ खेलकुद क्लबलाई ३–० ले र रुद्रेपिपलले युनिटी युथ क्लबलाई २–० ले हराएको छ ।
२१ औं मिनेटमा प्राप्त पेनाल्टीलाई गोलमा परिणत गर्दै गणेश लामिछानेले चिल्ड्रेन लाइफलाई अग्रता दिलाएका थिए । कमजोर रक्षापक्तिको फाइदा उठाउँदै रञ्जित थापाले २४ औं मिनेटमा टोलीका लागि दोस्रो गोल गरे । दोस्रो हाफको १६ औं मिनेटमा सरोज थापाले गोल गरेपछि टोलीको जित सहज बन्यो ।
अर्को खेलको २४ औं मिनेटमा रोशन केसीले पेनाल्टी गोलमार्फत रुद्रेपिपललाई अग्रता दिलाएका थिए । त्यसो ५ मिनेटपछि गणेश विसीले २९ औं मिनेटमा गरेका थिए । अखिल नेपाल फुटबल संघ (एन्फा) को बार्षिक कार्यक्र अनुसार बागलुङ जिल्ला फुटबल संघले आयोजना गरेको प्रतियोगितामा जिल्लाका १० टोलीको सहभागिता रहेको छ ।
प्रतियोगिता जेठ २९ गते सम्म चल्ने जिल्ला संघका महासचिव जय राजभण्डारीले जानकारी दिए । प्रतियोगिताको उद्घाटन बागलुङ नगरपालिकाका नवनिर्वाचित मेयर जनकराज पौडेले गरेका थिए ।
लिग विजेताले उपाधिसहित ५० हजार र दोस्रो हुने टोलीले २५ हजार रुपैयाँ प्राप्त गर्नेछन् । त्यस्तै प्रतियोगितामा सर्वोत्कृष्ट खेलाडी र अनुशासित टिमले २–२ हजार प्राप्त गर्नेछन् । उत्कृष्ट गोलकिपर, रक्षक, मिडफिल्ड, स्ट्राइकर र उच्च गोलकर्ताले समान १ हजार रुपैयाँ प्राप्त गर्ने संघले जनाएको छ ।
जिल्ला लिगमा भोली पहिलो खेल समूह ‘बि’मा रसआवर फुटसल र पावर फिटनेस क्लब, समुह ‘ए’ मा बागलुङ खेलकुद क्लब र रुद्रेपिपल तथा चिल्ड्रेन लाइफ र युनिटि युथ क्लबबीच प्रतिस्पर्धा हुनेछ ।
