एन्टिगुवा (एजेन्सी)– भारतले वेस्ट इन्डिजविरुद्धको पाँच एक दिवसिय अन्तर्राष्ट्रिय क्रिकेट श्रृखंलामा २–० को अग्रता लिएको छ । तेस्रो एक दिवसिय खेलमा शुक्रबार भारतले घरेलु टोलीलाई ९३ रनले हराएको थियो ।
भारतका पूर्व कप्तान महेन्द्रसिंह धोनी ब्याटिङ गर्दै (दायाँ) ।
अर्धशतक बनाएका पूर्व कप्तान महेन्द्र सिंह म्यान अफ दी म्याच भएको खेलमा भारतले पहिले ब्याटिङ गर्दै निर्धारित ५० ओभरमा २ सय ५१ रनको मध्यम स्कोर खडका गरेको थियो । जवाफमा वेस्ट इन्डिजले ३८.१ ओभरमा अलआउट हुँदै १ सयय ५८ रन मात्र बनाउन सक्यो ।
वेस्ट इन्डिजलाई लक्ष्यमा पुग्न नदिन भारतीय बलर कुलदिप यादव र रविचन्द्रन आश्विनले समान ३ विकेट लिए । त्यस्तै हार्दिक पाण्डेयले २ तथा उमेश यादव र केदार जादवले समान १ विकेट लिए । आश्विनले १० ओभरमा १ मेडन राख्दै २८ रन खर्चेका थिए ।
घरेलु टोलीका लागि जासन मोहमम्दले सर्वाधिक ४०, रोभमान पावेलले ३०, साइ होपले २४ तथा कायल होपले १९ रन बनाए । अन्य कुनै पनि ब्याट्सम्यानले दोहोरो आँकडामा रन बनाउन सकेनन् ।
त्यसअघि वेस्ट इन्डिजले टस जितेर भारतलाई ब्याटिङका लागि आमन्त्रण गरेको थियो । भारत ३४ रन जोड्दा दुई महत्वपूर्ण विकेट गुमाइसकेको थियो । जसमा ओपनर शिखर धवन २ र कप्तान विराट कोहली ११ रन बनाएर आउट भएका थिए । अर्का ओपनर अन्जिके रहानेलाई युवराज सिंह र पूर्व कप्तान धोनीले राम्रो साथ दिएपछि भारतले मध्यम स्कोर खडा गर्न सकेको थियो ।
युवराजले ३९ रन बनाए । अघिल्लो खेलमा शतक बनाएका रहानले अर्धशतक पुरा गरे । उनले १ सय १२ बल खेल्दै ४ चौका र १ छक्काको मद्दतमा ७२ रन जोडे । धोनी ७८ र केदार ४० रनमा अविजित रहे । ७९ बल खेलेका धोनीले ४ चौका र २ छक्का प्रहार गरेका थिए । केदाले २६ बल खेल्दै ४ चौका र १ छक्का प्रहार गरे ।
यी दुईबीचको पहिलो खेल बर्षाका कारण अनिर्णित भएको थियो भने दोस्रो खेलमा भारत १ सय ५ रनले विजयी भएको थियो । चौथो एक दिवसिय आइतबार हुनेछ ।
