काठमाडौं (हाम्रो खेलकुद) – खेलकुद पत्रकार प्रिया लक्ष्मी कार्कीसहित पाँच महिला पत्रकार विश्वको सर्वोच्च शिखर सगरमाथा आरोहणको तयारीमा जुटेका छन् । समानताका लागि बुदल्न आवाज भन्ने नाराका साथ आरोहण गर्ने टोलीलाई राष्ट्रपति विद्यादेवी भण्डारीले हिजो राष्ट्रपति भवनमा शुभकामना दिएकी छन् ।
प्रथम महिला पत्रकार सगरमाथा आरोहण २०१८ नाम दिइएको उक्त आरोहण टोलीलाई राष्ट्रपति भण्डारीले नेपाली नागरिक, महिला तथा पत्रकारको हैसियतले पेचिलो सामाजिक जिम्मेवारी बोध गर्दै ६४ वर्षको सगरमाथा आरोहणको इतिहासमा नयाँ आयाम थपिने भन्दै यस उत्साहजनक सोच सराहनीय भएको बताइन् । उनले आरोहणले सम्पूर्ण नेपाली र नेपालको नाम फैलिने कार्य हुने भएकोले हरतरहको सहयोग गर्ने प्रतिबद्धता व्यक्त गर्दै आरोहण टोलीलाई सफलताको शुभ कामना दिइन् ।
नेपाल खेलकुद पत्रकार मञ्चकी सदस्य समेत रहेकी न्यूज २४ मा कार्यरत प्रियालक्ष्मीसहित आरोहन टोलीमा राष्ट्रिय समाचार समितिकी रोशा बस्नेत, मेघा टेलिभिजनकी कल्पना महर्जन, नेपाल टेलिभिजन तथा विपी कोईराला ममोरियल प्लानेटेरियम अब्जरभेटरी र विक्षान सङग्रहालय विकास समिति की रोजिता बुद्धाचार्य र स्वतन्त्र पत्रकार देउराली चाम्लिङ छन् । उनीहरुले चैतमा सर्वोच्च शिखर सगरमाथा आरोहण गर्ने बताइएको छ ।
आरोहण सम्बन्धि तालिमका लागि बुधार पत्रकार महिलाको टोली दोलखास्थित यालुङरी र रामदुङ ६ हजार मिटरका दुई हिमाल आरोहण गर्न दोलखा रोलवालिङ जाँदैछन् । आरोहण टोलीलाई सबै खाले सहयोगको आवश्यकता रहेको टोलीकी संयोजक कल्पना महर्जनले बताइन् ।
