काठमाडौं (हाम्रो खेलकुद) – पोखरामा जारी छैटौं संगम कप फुटबल प्रतियोगितामा रन्जन मेमोरियल स्मृतिले रोमाञ्चक जित हात पारेको छ । रन्जन मेमोरियलले टुडिखेल युनाइटेडलाई ६-४ को गोल अन्तरले पराजित गरेको हो ।
रन्जन मेमोरियलको जितमा सुसान गुरुङले दुई तथा प्रविन गुरुङ, विजय तामाङ, असोक थापा र श्रमिक गुरुङले एक-एक गोलको योगदान दिए । टुडिखेलका प्रविन गुरुङ र सुदिप पाठकले दुई-दुई गोल गरेका थिए ।
त्यस्तै बुटवल खर्चटिकार एकेडेमीले पोखराको नागढुंगा क्लबलाई ५-० ले हराउन सफल रह्यो । खर्चटिकार एकेडेमीको जितमा सुजल राना र नमोज श्रेष्ठले दुईदुई गोल गरे भने कृष्ण रानाले एक गोल गरेका थिए ।
अन्य खेलमा आर टि ट्रेनिङलाई गार्डेन फुटबलले ४-० ले हरायो भने भद्रकालीले टुडिखेल बीलाई सोहि स्कोरले पराजित गर्यो । पोखराको संगम क्लबको आयोजनामा संचालन भएको उक्त प्रतियोगिता अन्तर्गत भोलि पहिलो चरणका अन्य ५ खेल हुने छन् ।
