काठमाडौं (हाम्रो खेलकुद) – बृहस्पति विद्यासदनको आयोजनामा शनिबार वाकाथन तथा रोड रेस च्याम्पियनसिप हुने भएको छ । आयोजक बृहस्पति विद्यासदनले शुक्रबार राजधानीमा पत्रकार सम्मेलनको आयोजना गर्दै विद्यालयले वाकाथन र रोड रेस च्याम्पियनसिप गराउने जानकारी गराएको हो ।

रोड रेस तीन चरणमा हुनेछ । पहिलो चरणमा कक्षा ८ देखि १२ कक्षासम्मको, दोस्रो चरणमा कक्षा ६ र ७ को तथा तेस्रो चरणमा वाकाथन हुनेछ । वाकाथनमा जुनसुकै खेलाडीले पनि सहभागिता जनाउन पाउनेछ ।

बृहस्पतिका प्राध्यापक सुमन थिङ लामाले ‘क्लिनर नेभरहुड’ अर्थात आफ्नो टोल र छिमेक सफा राखौं र सुरुवात आफैंबाट गरौं भन्ने नारालाई आत्मसात गर्ने उद्देश्यले ३ किलोमिटरको रोडरेस र ५ किलोमिटरको वाकाथन आयोजना गर्न लागिएको बताए । सबै स्पर्धामा गरेर करिब ५०० जनाले प्रतिस्पर्धा गर्ने आयोजकले जनाएको छ ।

हरेक कक्षाका पुरुष र महिला विजेता छुट्याइने छन् । उनीहरुले मेडल र प्रमाणपत्र प्राप्त गर्नेछन् । रेस बालमन्दिरबाट सुरु भएर भगवती बहाल, सानो गौचरन, कालोपुल, सिफल, चावहिल, गणेशथान, भत्केको पुल, हाँडीगाँउ, विशालनगर र भाटभटेनी हुँदै बालमन्दिर गेटमा आएर सकिनेछ ।

वाकाथन भने बालमन्दिरबाटै सुरु भएर विशालनगर हुँदै टुडाल देवी, बालुवाटार, चिनियाँ दुतावास हुँदै भाटभटेनीमा आएर सकिनेछ । प्रतियोगिताको लागि करब ५ लाख बजेट खर्च हुने आयोजकले जनाएको छ ।