काठमाडौं (हाम्रो खेलकुद) – आसन्न अखिल नेपाल फुटबल संघ (एन्फा) को अध्यक्ष पदको लागि कर्माछिरिङ शेर्पा र मणि कुँवरबीच प्रतिस्पर्धा हुने भएको छ ।

उम्मेदवारी दर्ताको अन्तिम दिन संस्थापन पक्षबाट एन्फाका वरिष्ठ उपाध्यक्ष मणि कुँवर र विद्रोही पक्षका कर्मा छिरिङ शेर्पाको मात्रै उम्मेदवारी परेपछि यी दुईबीच प्रतिस्पर्धा हुने भएको हो । शेर्पाले गत माघ २७ गते उम्मेदवारीको घोषणा गरेका थिए भने, मणि कुँवरले शुक्रबारै उम्मेदवारी घोषणा तथा दर्ता गरेका थिए । एन्फाको निर्वाचन चैत १४ गते हुदैछ ।

अध्यक्षका उम्मेदवार कुँवरलाई वर्तमान अध्यक्ष नरेन्द्र श्रेष्ठको समर्थन छ भने, शेर्पाले कृष्ण थापा र एन्फाका पूर्व महासचिव इन्द्रमान तुलाधरको समर्थन छ । यससँगै एन्फाले फेरि नयाँ नेतृत्व पाउने भएको छ । १० वर्षको प्रतिबन्धसहित २१ लाख जरिवाना खेपिरहेका तत्कालिन एन्फा अध्यक्ष गणेश थापाको बहिर्गमनसँगै एक वर्षअघि भएको निर्वाचनबाट कार्यवहाक अध्यक्ष नरेन्द्र लाल श्रेष्ठ अध्यक्ष पदमा निर्वाचित भएका थिए । उपाध्यक्षमा मणि कुँवर विजयी भएका थिए ।

अध्यक्ष पदका लागि उम्मेदवारी घोषणा गर्दै वरिष्ठ उपाध्यक्ष कुँवरले फुटबल विकासको लागि आफूले उम्मेदवारी दिएको बताए । ‘म सबैको साझा उम्मेदवार हुँ, लोभ र लालचभन्दा माथि उठेर फुटबल विकासमा लाग्नुपर्छ । चार बर्षमा राम्रो एन्फा, हाम्रो एन्फा बनाउन मैले उम्मेदवारी दिएको हुँ ।’ उमेदवारी घोषणा गर्दै कुँवरले भने,‘एन्फालाई सुशासन, जवाफदेही बनाउने लक्ष्य छ । अनुभुतिले भरिपूर्ण र स्पष्ट एन्फा हुनेछ ।’

यस्तै नाताले भिनाजु पर्ने प्रतिबन्धित एन्फाका पूर्व अध्यक्ष गणेश थापाको बारेमा कुँवरले नातेदारको हिसावमा भेटघाट भइरहेको र एन्फाको निर्वाचनको विषयबाट उनी विशुद्ध रुपमा बाहिर रहेको बताए । ‘गणेश थापाले २२ वर्षसम्म नेतृत्वमा रहेर र त्यो भन्दा अघि राष्ट्रका लागि खेलेर नेपाली फुटबललाई योगदान दिएका छन् । हामीले गणेश थापाको राम्रो कुरालाई पनि अनुशरण गर्नुपर्छ ।’

कुँवरले भने, ‘म थापाको नातेदार हुदैमा एन्फा अध्यक्ष पदमा उठ्न नपाउने हो र ? नातेदारकै हिसावमा म उठेको हैन । म पनि २०५१ सालबाट फुटबलमा निरन्तर छु ।’यस्तै कुँवरले एन्फा अध्यक्षमा निर्वाचित भए आफ्नो कार्यकालमा खेलाडीले खेलेर, प्रशिक्षकले प्रशिक्षण गराएर र रेफ्रीले खेल खेलाएर बाँच्ने आधार बनाउदै एन्फाको हरेक निकायहरुलाई चलायमान बनाउने थपे ।

एन्फाका अध्यक्ष नरेन्द्र श्रेष्ठले पारिवारिक कारणले आफुले उमेदवार दिन नसकेको बताउदै एन्फाको अध्यक्ष पदको लागि कुँवर उपयुक्त व्यक्ति रहेको बताए । ‘पारिवारिक कारणले मैले यसपटक उम्मेदवारी दिइन । तर, म फुटबलबाट पलायन हुनेछैन ।’ अध्यक्ष श्रेष्ठले भने, ‘हाम्रो छलफलले नै कुँवरलाई अध्यक्षमा उठाउन निर्णय भएको हो । कुँवरलई मेरो पूर्ण समर्थन रहनेछ र उनको जित निश्चित छ ।’

यस्तै श्रेष्ठले थ्री स्टारको केसमा गम्भीर भुल गर्दा, समयमै निर्णय दिन नसक्दा र देश नै निर्वाचन मय भएका कारण हुन नसकेको ‘ए’ डिभिजन लिग गराउन नसकिएको स्वीकारे । ‘हामीले थ्री स्टारलाई फुटबलमा फर्काइसकेका छौं । अब मात्रै सेड्युलको मात्रै समस्या छ । यो पनि छिट्टै समाधान हुनेछ ।’

श्रेष्ठ भने, ‘जहाँसम्म अदृश्य शक्तिको कुरा आएको छ । यो कसरी आयो उनीहरुलाई नै थाहा होला । हामीमा यसको कुनै प्रभाव छैन । यसरी अदृश्य शक्तिको कुरा गरेको कसैलाई दोष दिएर पन्छिन खोज्नुभन्दा हिम्मत गरेर अघि बढ्न म आग्रह गर्दछु ।’ निरन्तर फुटबलमा लागिरहेका कर्मठ कुँवर गणेश थापाकै सालो भएर फाइदा भन्दा बेफाइदा भएको बताउदै म कुँवरको उम्मेदवारीमा पारिवारिक नेतृत्व नरहेको दावी गरे ।

४ उपाध्यक्ष पदको लागि ११ जनाको उम्मेदवारी परेको एन्फाका कार्यवहाक सिइओ सञ्जिव मिश्रले जानकारी गराए । उपाध्यक्ष पदको लागि मोहम्मद समिउल्लाह, पंकजविक्रम नेम्वाङ, राजेन्द्र न्यौपाने, किशोर राई, गणेश बाहदुर चन्द, विराटजंग शाही, सुनिल राणा, कृष्ण थापा, वीर बहादुर खड्का उपेन्द्रमान सिंह र अरुणमान जोशीले शुक्रबार उम्मेदवारी दर्ता गराए ।

यस्तै ११ सदस्य पदको लागि ३५ जनाको उमेदवारी दर्ता गरेको छ । एक महिला सदस्य पदको लागि रमा भट्टराई र पेमा लामाको उमेदवारी परेको एन्फाका कार्यवहाक सिइओ सञ्जिव मिश्रले जानकारी गराए । निर्वाचित कार्यसमितिले महासचिव र कोषाध्यक्ष मनोनयन गर्नेछन् । निर्वाचनमा २५ जिल्ला, ए, बि र सी डिभिजन क्लब तथा एन्फाका बिभिन्न समितिसहित ७७ कमिटिले मतदान गर्न पाउनेछन् ।