काठमाडौं (हाम्रो खेलकुद) – परिवर्तन पक्षधरबाट अखिल नेपाल फुटबल संघ (एन्फा) का अध्यक्षका उमेदवार कर्मा छिरिङ शेर्पाले नेपाली फुटबलले अन्तर्राष्ट्रिय फुटबल महासंघ (फिफा) र एसियाली फुटबल महासंघ (एएफसी) बाट अन्तिम मौका पाएको बताएका छन् ।

निर्धारित समय चैत १४ मा एन्फा निर्वाचन हुन नसकेपछि र त्यसपछिको पछिल्लो प्रगतिबारेको समिक्षात्मक कार्यक्रममा बोल्दै अध्यक्षका उमेदवार शेर्पाले नेपाली फुटबलले अन्तिम मौका पाएको बताएका छन् । निर्धारित समयमा निर्वाचन गराउनका लागि फिफा र एएफसीको टोली नेपालमा अध्ययन गर्न आएको थियो । उनले बैशाख ९ गते एन्फाको निर्वाचन गर्न माग पनि गरे ।

‘हाम्रो अनुरोधमा नेपाली फुटबललाई लाग्न सक्ने प्रतिबन्ध अहिलेको लागि टरेको छ ।’ एन्फाको विधान अनुसार ४ वर्ष ६ महिनासम्म पनि चुनाव नभएको अवस्थामा स्वतः अबैधानिक हुने प्रावधान छ, त्यसबाट जोगिन पनि बैशाख ६ गतेको आसपासमा निर्वाचन सम्पन्न गरिसक्नुपर्छ । पत्रकार सम्मेलनका शेर्पाले भने, ‘हामीले दुई जिल्लाको फुटबल संघको विवाद समाधान गर्ने र एन्फाको निर्वाचनको मिति छिट्टै घोषणा गर्ने एएफसी प्रतिनिधिलाई वाचा गरेका छौं । सम्भवतः २३ चैत र २७ चैतमा दुई जिल्लाको निर्वाचन सकिनेछ । त्यसपछि वैशाख ६ देखि ९ गतेको लागि एन्फा निर्वाचनको मिति तोक्नेछौं ।’

अध्यक्षका उमेदवार शेर्पाले भक्तपुरका तीन क्लबले भक्तपुर जिल्ला फुटबल संघविरुद्ध हालेको मुद्धा फिर्ता लिएसँगै नयाँ वातावरण सिर्जना भएको बताए । शेर्पाले भने ‘हामीले तीन चारदिनको समय लगाएर भक्तपुरको विवाद समाधान गरेका छौं । भक्तपुरको विवाद अन्त्यसँगै एन्फाको निर्वाचन निर्धारित मितिमै हुन नसकेपनि अब हुने निर्वाचनमा कसैले पनि रोक्न सक्दैन ।’

शेर्पाले भने, ‘फिफा र एएफसीको प्रतिनिधिसँगको भेटमा हामीले एकपटक मौका दिन आग्रह गर्दा उनीहरु सकरात्मक देखियो । नेपाली फुटबल प्रतिबन्ध होस् नै भन्ने चाहनेहरु रहेको अवस्थामा पनि हामीले अन्तिम पटकको मौका पाएका छौं । यो मौकालाई सदुपयोग गर्न सकिएन भने नेपाली फुटबल प्रतिबन्धमा पर्ने पक्का छ ।’

यस्तै शेर्पाले  निर्वाचन रोकिएपनि साधारण सभा किन रोकियो भन्नेमा गुनासो पोखे । उनले थपे‘हामीले उच्च अदालतको नियमलाई मान्नै पर्छ । तर, उच्च अदालतले निर्वाचन नगराउनु मात्रै भनेको छ । साधरणसभामा निर्वाचन मात्र महत्वपूर्ण विषय थिएन । फुटबल सम्वन्धीका अन्य एजेण्डाको विषयमा पनि छलफल हुने थियो ।’

शेर्पाले भने, ‘एन्फा अध्यक्ष नरेन्द्र श्रेष्ठ साधारण सभा गराउन सकरात्मक देखिनु भएको छ । निर्वाचन चाडोभन्दा चाडो सम्पन्न गराउन हामीले माग गरेका छौं । मिति तोकेर त्यही अनुसारको रोडम्याप कार्यन्वयन गर्ने विषयमा मौखिक सहमति भएको छ ।’ यस्तै शेर्पाले जुन अवस्थामा एन्फाको निर्वाचन रोकिएको छ, त्यही अवस्थाबाटै कार्यतालिका पनि अघि बढ्ने बताए ।

पत्रकार सम्मेलनमै परिवर्तन पक्षधरबाट उपाध्यक्षका उमेदवार बनेका किशोर राईले आफ्नो उमेदवारी फिर्ता भएको घोषणा गरे । यससँगै परिवर्तन पक्षधरबाट उपाध्यक्षको उमेदवारमा पंकज नेम्वाङ, उपेन्द्रमान सिंह, कृष्ण थापा र वीरबहादुर खड्का रहेका छन् । एन्फाको अध्यक्षका लागि कर्माको प्रत्यासीका रुपमा वरिष्ठ उपाध्यक्ष मणि कुँवर छन् ।