काठमाडौं (हाम्रो खेलकुद)- नेपाली राष्ट्रिय क्रिकेट टोलीले अर्को महिना हुने युरोपेली भ्रमणका लागि प्रशिक्षण थालिसकेको छ । प्रशिक्षक जगत टमाटा, कप्तान पारस खड्का र आइसीसी प्रतिनिधि अमिनुल इस्लामले शुक्रबार २० सदस्यीय प्रारम्भिक टोली घोषणा गरेका थिए । यद्यपि भ्रमणका लागि भने टोलीलाई छोट्याएर १४ सदस्यीय बनाइने छ ।

राष्ट्रिय टोलीबाट लामो समयदेखि मध्यक्रम सम्हालिरहेका शरद भेषावकर हाल अमेरिकामा छन् । नेपालले न २०१८ को सुरुआतमा खेलेको डिभिजन २ पछि अमेरिका पुगेका उनले विश्वकप छनोटका लागि अमेरिकाबाटै टोलीसँग मिसिएका थिए । त्यसपछि उतै रहेका उनले नेपाल फर्किएका छैनन् । पुत्रलाभ भएपछि श्रीमती निशा अधिकारीसँग अमेरिकामा रहँदै आएका शरद प्रशिक्षण सुरु भएसंगै नेपाल आउने चर्चा भने चलेको छ । अहिले उनले अमेरिकामै बसेर आफूलाई तयार गरिरहेको सामाजिक संजालमार्फत बताएका छन् । तर औपचारिक प्रतियोगितामा नभएर आफुलाई फिट राख्न उनले अभ्यास खेलमा मात्र सहभागिता जनाइरहेका छन् ।

शरदलाई नेपालका पूर्व प्रशिक्षक पुबुदु दासनायाकेको सहयोगमा वासिङ्गटन क्रिकेट लिगमा सहभागिता जनाउने मौका मिलेको हो । हाल यस लिगमा पूर्व पाकिस्तानी क्रिकेटर मोहमद आसिफ, सलमान बट, दक्षिण अफ्रिकी रस्टि थेरन, भारतका विपुल शर्मा लगायत खेलाडी खेलिरहेको शरदले जनाएका छन् । यद्यपि यो लिग औपचारिक लिग भने हैन ।

शरदले अमेरिकामै रहेर नेट सेसन र फिटनेस सेसन पनि लिइरहेका छन् । तर नेपाली टोली दिनहुँ कीर्तिपुरस्थित त्रिवी मैदानमा प्रशिक्षण गरिरहंदा शरद विदेशमै रहेर आफैं प्रशिक्षण गर्दा उनक स्तर मापन कसरि हुन्छ भन्ने प्रश्न उब्जिएको छ । हालको स्थितिमा मध्यक्रममा निकै प्रतिस्पर्धा बढेको र युवा खेलाडीले नियमित राम्रो प्रदर्शन गरिरहेको अवस्थामा शरदले टोलीमा पर्न मिहिनेत गर्नुपर्ने देखिन्छ । छनोट प्रतियोगिताको रुपमा लिइएको प्रधानमन्त्री कपमा सहभागिता नजनाउनु र यसअघि नेपालले खेलेको अन्तर्राष्ट्रिय प्रतियोगितापनि चोटका कारण नखेल्नुले शरदलाई यसपटक टोलीमा स्थान बनाउन थप मिहिनेत गर्नुपर्ने अपेक्षा गरिएको थियो ।

हाल नेपालको मध्यक्रममा युवा खेलाडी रोहित कुमार पौडेल र आरिफ शेखले नियमित उत्कृष्ट प्रदर्शन गरिरहेका छन् । घरेलु प्रतियोगितामा पनि राम्रो खेलेका उनीहरु दुइमध्य एक खेलाडी शरद खेलेको अवस्थामा बाहिर बस्नुपर्ने हुनसक्छ । नेपालले पहिलो वान डे अन्तर्राष्ट्रिय खेल खेल्दा उत्कृष्ट फर्ममा भएका खेलाडीलाई प्राथमिकता दिनुपर्ने समर्थकको पनि जोड रहेको छ । यसमा प्रम कपमा राम्रो ब्याटिङ गरेका हरि क्षेत्रीले पनि आफ्नो सम्भावना खोज्नेछन् ।

शरदले राष्ट्रिय टोलीमा आफ्नो स्थान बनाउन पनि अब मिहिनेत गर्नुपर्ने बेला आइसकेको छ । अमेरिकामा रहेर स्वयं प्रशिक्षण गरेको भरमा राष्ट्रिय टोलीमा स्थान बनाउन अब कठिन देखिन्छ । यसैपनि विवादित बन्दै आएको राष्ट्रिय टोलीको छनोटमा शरद थप विवादको पत्र बन्न पक्कै चाहदैनन् । शरद जस्ता स्तरीय खेलाडीले टोलीमा स्थान बनाउन कसरत गर्नुपर्ने पक्षले भने नेपाली क्रिकेट उन्नतिको पथमा अगाडी बढेको संकेत दिन्छ ।