काठमाडौं (हाम्रो खेलकुद) – अखिल नेपाल फुटबल संघ (एन्फा) को लोगो र नेपाली राष्ट्रिय टोलीको जर्सीको डिजाइन फेरिने भएको छ । खुला प्रतिस्पर्धातका आधारमा एन्फाले लोगो र जर्सी डिजाइन गरिने एन्फाले जनाएको छ । लोगो र जर्सी डिजाइनको प्रतिस्पर्धा शनिबारबाट खुला गरिएको छ ।

एन्फाले खुल्ला प्रतिस्पर्धामार्फत उत्कृष्ट मानिने लोगो र जर्सीको डिजाइन गर्नेलाई ५० हजार रुपैया पुरस्कारको समेत व्यवस्था गरेको छ । एन्फामा नयाँ नेतृत्व आएसँगै लोगो र जर्सी परिवर्तन गर्न लागिएको हो । वैशाख २२ गते कर्मा छिरिङ शर्पाको नेतृत्वमा केन्द्रिय समिति निर्वाचित भएको थियो ।

लोगो र जर्सीले नेपाल र फुटबललाई झल्को दिने, अन्तर्राष्ट्रिय स्तर र उच्च गुणस्तरीय हुनुपर्नेछ । यस्तै लोगो र जर्सीमा चार भन्दा बढी रङ हुनु नहुने तथा वाटरमार्क हुन नहुने उल्लेख छ । लोगो र जर्सी डिजाइनको लागि १० दिनको समय तोकिएको छ ।

यसअघि एन्फाको लोगोमा नेपालको नक्सासहित सगरमाथामा नेपालको दुईवटा राष्ट्रिय झन्डाभित्र फुटबलसहितको लोगो चल्तीमा थियो । राष्ट्रिय टिमले लगाउने रातो र निलो जर्सीमा नेपालको राष्ट्रिय झन्डा राखिएको थियो । एन्फाको पछिल्लो लोगो २०६२ ०६३ को आन्दोलनपछि परिवर्तन गरिएको थियो ।