काठमाडौं (हाम्रो खेलकुद) – म्याग्दी मगर समाजले सातौ रनिङ शिल्ड धनुषवाण प्रतियोगिताको उपाधि जितेको छ । शुक्रवार बेलुका कृतिम प्रकाशमा खेलाईएको १० डोरको खेलमा ११७ अंक जोड्दै म्याग्दी मगर समाजले उपाधि जितेको हो ।

कुल १२० अंकका लागि खेलाईएको १० डोरको खेलमा म्याग्दी मगर समाजले ३ अंक गुमाएको थियो । सात सदस्य टिम स्पर्धामा ६ जना खेलाडीले खेल्न पाउने नियम रहेको छ । प्रत्येक खेलाडीले एक डोरमा २ तीर निशानामा लागाउने पर्नेमा म्याग्दी मगर समाजका जुलुक पुन, कमल पुर्जा, प्रवेश फगामी र हरि पुनले सतप्रतिसत नतिजा निकाल्दै १० डोरमा २० तीरलाई अचुक निशाना लगाएर समान २०÷२० अंक जोडेका थिए । देब रोकाको एउटा प्रहार चुके पछि १९ अंकको योगदान दिदा तलबहादुर गर्बुजाले दुई निशाना खेर फाल्दै १८ अंक जोडेका थिए । दोश्रो स्थानमा रहेको नेपाल छन्त्याल संघले १० निशाना चुके पछि ११० अंकमा चित्त बुझाएको थियो । त्यस्तै नेपाल जापान सम्पर्क समितिले १०५ अंक जोड्दै तेस्रो स्थान हात पा¥यो ।

थासाङ स्पोर्टस् क्लबको आयोजनामा भएको प्रतियोगितामा नेपाल छ्रन्त्याल संघका राजु छन्त्याल दोहोरो उपाधि जित्दै सर्वाेत्कृष्ट धनुषधरको उपाधि जित्न सफल भए । ब्यक्तिगत स्पर्धाको खेलमा कुल १० अंक जोड्दै सर्वोकृष्ट धनुषधरको उपाधि जित्दै ३३ हजार ९ सय नगद प्राप्त गरे । टिम स्पर्धामा २० अंक जोड्ने ७ खेलाडीलाई पछि पादै बिशिष्ट धनुषधरको उपाधि पनि जित्न सफल भए ।

बिजेता टिम तथा खेलाडीलाई कार्यक्रमकी प्रमुख अतिथि थकाली सेवा समितिकी केन्द्रिय अध्यक्ष कृष्णकुमारी शेरचन,आयोजक थासाङ स्पोर्टस् क्लबका अध्यक्ष कृष्ण शेरचनलगायतले पुरस्कृत गरेका थिए । सो अवसरमा प्रायोजक प्रभु लाईभ इन्स्युरेन्सका खगेन्द्र भट्चन,साग्रीला बिकाश बैंककी ज्योती गौचनलाई सम्मान गरिएको थियो । ५ दिने प्रतियोगिताको उद्घाटनका अवसरमा समूदायका खेलाडीद्धय शक्ति गौचन र शोभा गौचनलाई सम्मान गरेको थियो ।

यसैबीच थकाली सेवा समिति र थासाङ स्पोर्टस् क्लबले एशियाडमा सहभागि हुन जाने खेलाडीद्धय मिनप्रसाद गौचन र अशिम शेरचनलाई शुक्रवार बेलुकी बिदाई गरेको छ । थकाली सेवा समिति केन्द्रिय अध्यक्ष कृष्णकुमारी शेरचन र आयोजक थासाङ स्पोर्टस् क्लबका अध्यक्ष कृष्ण शेरचनलगायतल शुभकामना दिएका थिए ।

आर्चरीमा पुरुषतर्फ मिनप्रसाद गौचन, अशिम शेरचन, रोशन नगरकोटी र तिलक पुनमगर शनिवार त्यसतर्फ जादैछन् । पुरुषमा ब्यक्तिगत र टिम इभेन्टमा प्रतिस्पर्धा हुने छ भने उत्कृष्ट एक पुरुष खेलाडीले मिक्स डबलमा पनि प्रतिस्पर्धा गर्ने छन् । महिलातर्फ भने ज्ञानु अवालेले एकल र मिक्स डबलमा प्रतिस्पर्धा गर्ने छिन् । टिम प्रशिक्षकमा नेपाल आर्चरी संघका अध्यक्ष पूर्व राष्ट्रिय खेलाडी दिपकराज गुरुङ र ब्यवस्थापकमा महासचिव रमेशप्रसाद शिवाकोटी टिमको नेतृत्व गरेर शनिवार जार्कतातर्फ जाँदै छन् ।