काठमाडौं (हाम्रो खेलकुद) – दिपज्योति आवासीय माध्यमिक विद्यालय टोखा नगरपालिका स्तरीय प्रथम मेयर कप अन्तर विद्यायलय स्तरीय खेलकुद प्रतियोगिता अन्तरको फुटसलमा च्याम्पियन बनेको छ ।

टोखा ग्रान्डीस्थित ग्रान्डी फुटसलमा शुक्रबार भएको फाइनलमा दिपज्योतिले ग्रीनल्यान्ड माध्यमिक विद्यालयलाई ३–० ले पराजित गर्दै च्याम्पियन बनेको हो ।

अमर माध्यमिक विद्यालयले सरस्वती माविलाई पेनाल्टी सुटआउटमा पराजित गर्दै तेस्रो स्थान हात पा¥यो । निर्धारित समयको खेल १–१ गोलको बराबरीमा सकिएपछि खेल पेनाल्टी सुटआउटमा धकेलिएको थियो । जसमा अमरले बाजी मारेको हो । फुटसलमा टोखा नगरभित्रका विभिन्न ३२ विद्यालयले नकआउटका आधारमा प्रतिस्पर्धा गरेका थिए । विजयी खेलाडीहरुलाई प्रतियोगिताको अन्तिम दिन पुरस्कृत गरिने आयोजकले जनाएको छ ।

टोखा नगरपालिकाको आयोजनामा विभिन्न विद्यालयको समन्वयमा टोखा नगरले विभिन्न चार खेल समेट्दै विद्यालयस्तरीय खेलुकद प्रतियोगिता ६ असारदेखि ११ असारसम्म आयोजना गरेको हो ।

अब दौड, ब्याडमिन्टन र रग्वी खेल रहेका रहेका छन् । दौड शनिबार हुनेछ । जसमा ५ कक्षासम्म १०० मिटर दौडमा छात्र/छात्रा, ५ देखि ८ कक्षासम्म २०० मिटरमा छात्र/छात्रा खुल्लामा मिनि म्याराथनमा छात्र/छात्रामै प्रतिस्पर्धा हुनेछ ।

तेस्रो दिन ब्याडमिन्टनमा छात्र/छात्रामा प्रतिस्पर्धा हुनेछ । अन्तिम दिन ११ गते रग्वीमा छात्र/छात्रामै प्रतिस्पर्धा हुनेछ । प्रतियोगिताको लागि करिव ७ लाख खर्च हुने अनुमान गरिएको प्रतियागिताको विजेताले शिल्ड र मेडल प्राप्त गर्नेछन् ।