एजेन्सी – असिस्ट किङको उपमा पाएको इटाली तथा युभेन्टसका लेजेन्ड आन्द्रे पिर्लाेले आधुनिक फुटबलका हस्तीमध्येको एक पोर्चुगिज तथा इटालियन क्लब युभेन्टसका स्टार फरवार्ड क्रिस्टियानो रोनाल्डोको तारिफ गरेका छन् ।

एक अन्तर्वार्ताका क्रममा पिर्लाेले रोनाल्डो गोल गर्ने मामलामा आधुनिक फुटबलकै सबैभन्दा पुर्ण खेलाडी रहेको भन्दै तारिफ गरेका हुन् । ‘आधुनिक फुटबलमा रोनाल्डो गोल गर्ने मामिलामा पुर्ण खेलाडी हुन् । रोनाल्डोमा कठिन अवस्थामा पनि गोल गर्ने क्षमता छ । उनी जसरी पनि गोल निकाल्न माहिर छन् ,’ अन्तर्वार्ताका क्रममा पिर्लाेले भने, ‘दुवै खुट्टा, हेडिङ, पेनाल्टी, फ्रिकिक, लङ रेन्ज, ब्याक हिल र ओभरहेड किक जुनसुकै पोजिसनमा पनि उनीमा गोल गर्ने क्षमता छ । उनीजस्ता कोही छैनन् ।’

यस्तै पिर्लाेले यदि आफुले रोनाल्डोको सहकर्मी भएर खेल्न पाएको भए म सर्वाधिक असिस्ट गर्ने खेलाडी बन्ने बताएका छन् । ‘रोनाल्डो र म सँगसँगै खेल्ने मौका पाएको भए । म सर्वाधिक असिस्ट गर्ने खेलाडी बन्थे होला । तर, त्यसो हुन सकेन,’ पिर्लाेले भनेका छन् । पिर्लाेले सन् २०१५ मा अन्तर्राष्ट्रिय फुटबलबाट सन्न्यास लिइसकेका छन् । सन्न्यासपछि उनले दुई वर्ष अमेरिकी मेजर लिग सकरमा खेलेका थिए ।

ब्रेसियाबाट व्यवसायिक खेल करियर शुरु गरेका पिर्लाेले सबैभन्दा लामो समय एसी मिलानमा बिताएका थिए । १९९८ मा इन्टर मिलान पुगेका पिर्लाे २००१ मा एसी मिलान पुगेका थिए । मिलानमा पिर्लाे २०११ सम्म रहे । मिलानमा पिर्लाेले २८४ खेलमा ३२ गोल गरेका थिए । त्यसपछि उनी युभेन्टसमा पुगेका थिए । युभेन्टसमा ५ वर्ष बिताउने क्रममा पिर्लाेले ११९ खेलमा १६ गोल गरेका थिए । उनले इटालीबाट ११६ खेलमा १३ अन्तर्राष्ट्रिय गोल गरेका छन् ।

पिर्लाेले मिलानबाट समान दुई–दुई सिरी ‘ए’ र च्याम्पियन्स लिग, कोपा इटालिया, सुपर कोपा इटालिया, युइएफए सुपर कप र फिफा क्लब विश्वकप समान एक–एक पटक जितेका छन् । युभेन्टसबाट ४ सिरी ‘ए’ उपाधि र एक–एक पटक कोपा इटालिया र सुपर कोपा इटालियाको उपाधि जितेका छन् । इटालीले २००६ मा फिफा विश्वकप जित्दा पिर्लाे टोलीका मुख्य खेलाडी थिए ।

यता, स्पेनिस क्लब रियल म्याड्रिडका लेजेन्ड तथा सर्वाधिक गोलकर्ता ३६ वर्षे रोनाल्डोले अहिले पिर्लाेकै पुर्व क्लब युभेन्टसबाट खेलिरहेका छन् । रोनाल्डोले सिरी ‘ए’ मा लगातार ११ खेलमा गोल गर्दै कीर्तिमान समेत बनाइसकेका छन् ।