एजेन्सी – स्पेन तथा स्पेनिस क्लब बार्सिलोनाका लेजेन्ड जाभी हर्नान्डेजले कतारी क्लब अल सादको प्रशिक्षकको रुपमा थप एक वर्षको लागि सम्झौता नवीकरण गरेका छन् ।

पछिल्लो समय आफ्नै पूर्व क्लब बार्सिलोनाको प्रशिक्षक बन्ने चर्चा चलिरहेको बेला आइतबार राति क्लबसँग थप एक सिजन क्लबमा रहने गरी नयाँ सम्झौता गरेका छन् । सम्झौतासँगै जाभी २०२१ सम्म अल सादमा रहने छन् । जाभीले अल सादलाई दुई उपाधि दिलाएका छन् ।

जाभीले बार्सिलोनाको प्रशिक्षक बन्न प्रस्ताव आएमा सम्झौता तोड्न सक्ने शर्तलाई राखेका छन् । जाभीले समेत पछिल्लो समय आफु बार्सिलोनाको प्रशिक्षक बन्न चाहेको बताउँदै आएका छन् ।  बार्सिलोनाले गत जनवरीमा नै जाभीलाई प्रशिक्षक बनाउन प्रस्ताव गरेपनि जाभीले अनुभवको कमी रहेको भन्दै प्रस्तावलाई नकारेको र भविष्यमा जुनसुकै बेलापनि प्रशिक्षक बन्न सक्ने बताएका थिए ।

४० वर्षीय जाभीले १९९८ देखि २०१५ सम्म बार्सिलोनामा १७ वर्ष बिताउँदै विभिन्न २५ उपाधि जितेका छन् । जसमा चार च्याम्पियन्स लिग समावेश छन् । जाभीले बार्सिलोनाका लागि ७६७ खेल खेल्दै ८५ गोल गरेका छन् । उनी २०१५ मा कतारी क्लब पुगेका थिए । त्यहीबाट खेल्दै व्यवसायिक खेल जीवनबाट सन्यासको घोषणा गर्दै सोही क्लबको प्रशिक्षक बनेका थिए ।