काठमाडौं (हाम्रो खेलकुद) – कतार ओलम्पिक कमिटिले सन् २०३० को एसियाली खेलकुद आयोजना गर्ने दाबेदारी गरिरहँदा नेपाल ओलम्पिक कमिटी (एनओसी) सँग सहयोग र समर्थनका लागि अनुरोध गरेको छ ।
नेपाल भ्रमणमा रहेका कतार ओलम्पिक कमिटीको प्रतिनिधि मण्डलले बिहीबार एनओसीको सातदोबाटोस्थित कार्यालय भ्रमण गर्दै २०३० को एसियाली खेलकुद आयोजनाको दाबेदारीका लागि औपचारिक रूपमा सहयोग र समर्थनका लागि अनुरोध गरेको हो ।
भेटमा सांसद समेत रहेका अध्यक्ष जीवनराम श्रेष्ठको नेतृत्वमा रहेको नेपाली पक्षसँग दुई पक्षीय सहयोग र सम्बन्धलाई लिएर छलफल भएको थियो । नेपाली टोलीमा उपाध्यक्ष तथा कार्यकारी निर्देशक चतुरानन्दराज बैद्य र महासचिव निलेन्द्रराज श्रेष्ठ सम्मिलित थिए ।
एनओसीका अध्यक्ष श्रेष्ठले कतारी टोलीलाई नेपालमा स्वागत गर्न पाउँदा खुसी व्यक्त गर्दै एसियाली खेलकुद आयोजनाको कतारी दाबेदारीको सफलताको कामना गरेका छन् ।
‘कतारले यसअघि सन् २००६ मा एसियाली खेलकुदको सफलतापूर्वक आयोजना गरिसकेको छ । खेलकुद विकासमा कतार र नेपाल आपसी सहयोगका लागि वचनबद्ध रहेका छन् ’ अध्यक्ष श्रेष्ठले भने, ‘नेपाल र कतारको दुई पक्षीय सम्बन्ध पनि सुमधुर रहेको छ र यसले हामीबीचको खेल सम्बन्ध बलियो बनाउन मद्दत पुगेको छ ।’
कतारी टोलीका प्रमुख अल्बुनइनले नेपाल आउन पाउँदा खुसी लागेको बताउँदै आफ्नो देशको दाबेदारीमा नेपालको सहयोग र समर्थनका लागि अनुरोध गरेका हुन् । १२ सदस्यीय टोलीमा नेपालका लागि कतारका राजदुतसँगै एसियाली एथलेटिक्स संघका अध्यक्ष डहलान जमन अल हमद र एसियाली भारोत्तोलन संघका अध्यक्ष मोहम्मद युसेफ अल मन पनि रहेका थिए ।
