काठमाडौं (हाम्रो खेलकुद) – नेपाल ओलम्पिक कमिटी अन्तर्गतको ‘स्पोर्टस फर अल’ कमिसनको अध्यक्षमा पुनः विष्णुगोपाल श्रेष्ठ चयन भएका छन् ।

नेपाल ओलम्पिक कमिटीले शुक्रबार ११ सदस्यीय समिति चयन गर्दा विष्णुगोपाल श्रेष्ठ पुनः अध्यक्षमा चयन भएका हुन् । कमिसनमा बजरंग शाह, भोजराज सिटौला, धिरेन्द्र प्रधान, मुकुन्दराज शर्मा, पुजा शाही, राजन श्रेष्ठ, राजेश खड्का, राजेश श्रेष्ठ, रमेश कुमार श्रेष्ठ र रोजना प्रधान रहेका छन् ।

ओलम्पिक कमिटी अन्तर्गतको ‘स्पोर्टस फर अल’ कमिसन सबैभन्दा सक्रिय कमिसन हो ।कमिसनका अध्यक्ष श्रेष्ठले आउने वर्षमा खेलकुदबारे जन चेतना बढाउन धेरैभन्दा धेरै कार्यक्रम गर्ने बताएका छन् ।

‘खेलकुद सबै बर्गलाई चाहिन्छ । खेलकुद प्रतियोगिता र पदक जित्ने भावनामा मात्र सीमित छैन् । यो स्वास्थ्य क्षेत्रसँग पनि सम्बन्धित छ । कुनै न कुनै खेलमा सहभागी भएर स्वास्थ्य लाभ गर्न सकिन्छ ।’ अध्यक्ष श्रेष्ठले भने ।

नेपाल ओलम्पिक कमिटीका अध्यक्ष जीवनराम श्रेष्ठले कमिसन गठनको कार्यक्रममा शुभकामना व्यक्त गर्दै यसले आम नेपालीमा खेलकुदको महत्व र आवश्यकताबारे बुझाउन सफल हुनेमा विश्वस्त रहेको बताएका छन् । यस्तै ओलम्पिक कमिटिका अध्यक्ष श्रेष्ठले ‘खेलकुद खेलाडीसँग मात्रै नजोडिने र यो सबैको जीवनको एक भाग हुनुपर्ने बताएका छन् ।