काठमाडौं (हाम्रो खेलकुद) – धादिङ सदरमुकाम धादिङबेशीमा जिल्ला स्तरीय प्रथम मेयर कप खुल्ला ब्याडमिन्टन प्रतियोगिता बिहीबारदेखि शुरु भएको छ ।

धादिङ जिल्ला ब्याडमिन्टन संघको आयोजना, निलकन्ठ नगरपालिकाको प्रावधान तथा नेपाल ब्याडमिन्टन संघको प्राविधिक सहयोगमा भएको प्रतियोगितामा विभिन्न ८ विधा समावेश गरिएको छ ।

जसमा पुरुष एकल, पुरुष डबल्स्, महिला एकल, महिला डबल्स्, यु–१९ पुरुष एकल, ४५ वर्षमाथि भेट्रान्स डबल्स्, अफिसर्स टिम पुरुष डबल्स्, पालिकाअन्तर्गत पुरुष डबल्स् ‘बी’ र नगरपालिका अन्तर्गत पुरुष डबल्स् ‘सी’ विधा समावेश गरिएको छ ।

• 

प्रतियोगिताको निलकन्ठ नगरपालिकाका मेयर भीम प्रसाद ढुंगानाले एक कार्यक्रमकाबीच उद्घाटन गरे । खेलाडीको तर्फबाट रामचन्द्र गिरी र टेक्निकल अफिसियलको तर्फबाट प्रतियोगिताको रेफ्री उदय अर्यालले सपथ लिएका थिए ।

जिल्लास्तरीय प्रतियोगिता भएपनि प्रतियोगितामा २१६ जना खेलाडीको सहभागिता रहेको आयोजकले जनाएको छ । खेलाडी संख्या धेरै रहेको र कुल १७६ खेल हुने भएकाले तीन दिने प्रतियोगितामा एक दिन थप हुने आयोजकले जनाएको छ ।

प्रतियोगिताको पुरुष एकलतर्फको विजेताले ३० हजार रुपैया प्राप्त गर्नेछ । पुरुष डबल्स्को विजेताले ३५ हजार, महिला एकलको विजेताले १२ हजार, यु–१९ पुरुष एकलको विजेताले १५ हजार, ४५ वर्षमाथिको भेट्रान्सको विजेताले ३० हजार रुपैया हात पार्नेछ ।

यस्तै अफिसर्स टिम विजेताले १५ हजार, पालिकातर्फको विजेताले २० हजार र नगरपालिका अन्तर्गतको विजेताले १५ हजार रुपैया हात पार्ने आयोजकले जनाएको छ ।