काठमाडौं (हाम्रो खेलकुद) – ढुकु फुटसलले सोल्टी ११ नकआउट फुटसल प्रतियोगिताको तेस्रो संस्करणको उपाधि जितेको छ ।
गोङ्गबुस्थित मनाङ–मस्र्याङ्दी फुटसलमा शनिबार भएको फाइनलमा ब्रदर्श युनाइटेडलाई ४–१ ले पराजित गर्दै ढुकुले उपाधि हात पारेको हो । ढुकुको एकपक्षीय जितमा अमित लामाले २ तथा अभय राना र आदिल हामिदले समान एक गोल गरे ।
उपाधिसँगै ढुकुले ६६ हजार ६ सय ६६ रुपैया हात पारे । दोस्रो भएको ब्रदर्श युनाइटेडले ३३ हजार ३ सय ३३ रुपैयाँ हात पारे । ब्रदर्श युनाइटेडका मन्जिल महर्जन प्रतियोगिताको सर्वाेत्कृष्ट खेलाडी घोषित भए ।
ढुकुका अनिष श्रेष्ठ उत्कृष्ट गोलरक्षक तथा ढुकुकै अभय राना प्रतियोगिताको सर्वाधिक गोलकर्ताले भए । उनले प्रतियोगिताभर ८ गोल गरेका थिए । उत्कृष्ट सबैले जनही १ हजार ११ रुपैया हात पारे ।
विजयी खेलाडीलाई गोङ्गबु वडा नम्वर २६ का वडा अध्यक्ष खेमराज तिवारी र सोल्टी ११ समूहका अध्यक्ष दुर्गा गुरुङलगायतले पुरस्कृत गरे । दुई दिने प्रतियोगितामा विभन्न २८ टोलीले सहभागिता जनाएका थिए । पहिलो दिन नकआउटको १४ खेल तथा दोस्रो दिन शनिबार प्रि–क्वाटरफाइनल, क्वाटरफाइनल, सेमिफाइनल र फाइनलको खेल भएको थियो ।
सोल्टी ११ ले गुरुङहरुको महान पर्व तमु ल्होसारको अवसर पारेर हरेक गएको तीनवर्ष यता यो प्रतियोगिता आयोजना गर्दै आइरहेको छ । प्रतियोगिताको पहिलो संस्करणमा आरएमएफसी र दोस्रो संस्करणमा जोरपाटी एफसीले उपाधि जितेको थियो ।
आयोजक सोल्टी ११ का अध्यक्ष दुर्गा गुरुङले प्रशासनबाट स्वीकृति लिएर प्रतियोगितालाई निरन्तरता दिएको बताउदै अर्काे वर्ष पनि यही समयमा प्रतियोगिता हुने थपे ।
