काठमाडौं (हाम्रो खेलकुद) – बाँके नेपालगन्जका इरफान अन्सारी र रियाज अन्सारीको जोडीले भारतको उत्तर प्रदेश (बहरइच) मा भएको प्रथम राना आगम सिंह स्मृति आमन्त्रण ब्याडमिन्टन प्रतियोगिताको पुरुष डबल्सतर्फको उपाधि जितेको छ ।
यो दाजुभाईको जोडीले इलाहवादका अमरेन्द्र प्रताप सिंह र रवि मिश्रको जोडीलाई २१–१९ र २१–१८ को सोझो सेटमा पराजित गर्दै उपाधि जितेका हुन् । बाँकेकै बिलाल वारिस र राहुल गुप्ताको जोडीले प्रतियोगितामा तेस्रो स्थान हासिल गरेका छन् ।
इरफान पुरुष एकलको फाइनलमा अमरेन्द्र प्रताप सिंहसँग २–१ को सेटमा पराजित हुदै उपाधि विमुख बनेको थियो । पहिलो सेट १७–२१ ले गुमाएपनि इरफानले दोस्रो सेटमा २५–२३ को प्रतिस्पर्धात्मक जित निकालेको थियो । तर तेस्रो सेट इरफानले २१–१७ ले नै गुमाउन पुग्यो ।
प्रतियोगितामा उत्तर प्रदेशका विभिन्न ८ जिल्लासँगै नेपालीले पनि सहभागिता जनाएका थिए ।
