काठमाडौं (हाम्रो खेलकुद) – ‘गोल्डेन एथ्लेटिक्स मिट’ यसै महिना आयोजना हुने भएको छ । काठमाडौं जिल्ला एथ्लेटिक्स संघ, ललितपुर जिल्ला एथ्लेटिक्स संघ र भक्तपुर जिल्ला एथ्लेटिक्स संघको संयुक्त आयोजनामा प्रतियोगिता फागुन २९ गते शनिबार हुनेछ ।
त्रिपुरेश्वरस्थित दशरथ रंगशालामा आयोजना हुने एथलेटिक्स मिटमा सिनियरतर्फ महिला र पुरुषको ५ इभेन्ट र जुनियरतर्फ ३ इभेन्ट समावेश गरिएको आयोजकले जनाएको छ ।
सिनियरतर्फ १ सय मिटर, २ सय मिटर, ४ सय मिटर, ८ सय मिटर र तीन हजार मिटर दौड समावेश छ । यस्तै जुनियरतर्फ १ सय मिटर,४ सय मिटर र ८ सय मिटरमा प्रतिस्पर्धा हुनेछ ।
अहिले विभिन्न निकायले रोड रेस गरिरहेको अवस्थामा ट्रयाक इभेन्टहरु छायामा परेको अवस्थामा एथलेटिक्सका पुराना खेलाडीहरुको हौसलामा ट्रयाक इभेन्ट आयोजना गर्न लागिएको आयोजकले जनाएको छ ।
प्रो स्पोर्ट्स प्रालिको संयोजकत्वमा हुने प्रतियोगिताको पहिलो, दोस्रो र तेस्रो हुनेले क्रमशः ७ हजार, ५ हजार र ३ हजार नगद प्राप्त गर्नेछन् । सिनियर र जुनियरतर्फ उत्कृष्ट प्रदर्शन गर्ने महिला र पुरुष खेलाडीलाई पनि आकर्षक पुरस्कारको व्यवस्था गरिएको आयोजकले जनाएको छ ।
प्रतियोगितामा विभागीय टिमका खेलाडीका साथै अन्य निकायका खेलाडीले प्रतिस्पर्धा गर्न पाउने छन् । प्रतियोगिता सञ्चालन गर्न करिब ७ लाख रुपैयाँ खर्च हुने आयोजकले जनाएको छ ।
