काठमाडौं – भारतीय राष्ट्रपति प्रणव मुखर्जीको नेपाल भ्रमणले दुई देशबीचको सम्बन्धले थप उचाई लिने विश्वास इन्डो नेपाल फाउन्डेस, काठमाडौंका अध्यक्ष कासिम मिया धोवीले लिएका छन् ।
शिक्षा, स्वास्थ्य र खेलकुदका क्षेत्रमा काम गर्ने उद्देश्यले फाउन्डेसन झन्डै दुई महिना अघि स्थापना भएको थियो । नेपाल तेक्वान्दो संघका सदस्य समेत रहेका कासिम नेपाल पारा तेक्वान्दो समितिका अध्यक्ष समेत हुन् । इन्डो नेपाल फाउन्डेसनको १४ सदस्यीय कार्यसमितिमा ७ नेपाली र ७ भारतीय रहेको अध्यक्ष कसिमले जानकारी दिए ।
फाउन्डेसनले भविष्यमा नेपालको स्वास्थ्य क्षेत्रको सुधारका लागि र खेलकुदको विकासका लागि योजना ल्याउने कसिमले जानकारी दिए । ‘फाउन्डेसनको स्थापना दुई देशबीचको सम्बन्धलाई अझै मजबुद बनाउनु हो,’ सिमरा गोल्डकप फुटबल प्रतियोगिता आयोजक समितिका सदस्य समेत रहेका उनले भने,‘मुख्यतः शिक्षा, स्वास्थ्य र खेलकुद विकासमा सहयोग गर्नु हाम्रो फाउन्डेसनको लक्ष्य हो ।’
