काठमाडौं (हाम्रो खेलकुद) – डेढ वर्षअघि स्वदेशमा आयोजना भएको १३औं दक्षिण एसियाली खेलकुद (साग) का पदक विजेतालाई नेपाल एथलेटिक्स संघले नगदसहित सम्मानित गरेको छ ।
नेपाल एथलेटिक्स संघका अध्यक्ष राजीवविक्रम शाहले सागमा स्वर्ण पदक विजेता खेलाडीलाई व्यक्तिगत रुपमा १ लाख रुपैयाँ पुरस्कार दिने घोषणा गरे बमोजिम खेलाडीलाई पुरस्कृत गरेका हुन् । सागमा नेपालले ३ स्वर्ण, १ रजत र ४ कास्य जितेको थियो । रजत र कास्य जित्ने खेलाडीलाई संघको तर्फबाट सोमबारै सम्मानित गरेको छ ।
१३औं सागमा म्याराथनमा किरणसिंह बोगटी, सन्तोषी श्रेष्ठ र गोपीचन्द्र पार्कीले स्वर्ण पदक जितेका थिए । रजत पदक विजेतालाई ३५ हजार र कास्य पदक विजेतालाई समान २० हजार रुपैयाँ सोमबार प्रदान गरिएको छ ।
खेलाडीलाइै संघका अध्यक्ष राजीव विक्रम शाह, राष्ट्रिय खेलकुद परिषद राखेपका कार्यवहाक सदस्यसचिव एकेन्द्र कुँवर, प्रदेश खेलकुद परिषद बागमतीका सदस्यसचिव सुर्य भण्डारीलगायतले पुरस्कृत गरे ।
गोपीले सागमा ५ हजार मिटरको दौडमा स्वर्ण जितेका थिए । उनले निर्धारित दुरी १४ मिनेट ५४.२० सकेण्डमा पूरा गरेका थिए । सन्तोषीले १० हजार मिटर दौड ३५ मिनेट ६.९४ सेकेन्डमा दूरी पुरा गरेर स्वर्ण पदक जितेकी थिइन् । किरणले २ घण्टा २१ मिनेट १७ सकेन्डमा दौड पूरा गर्दै म्याराथनमा स्वर्ण पदक जितेका थिए ।
पुष्पा भण्डारीले निर्धारित दुरी २ घण्टा ५० मिनेट ११ सेकेन्डमा पूरा गर्दै राष्ट्रिय कीर्तिमानसहित म्याराथनमा रजत जितेकी थिइन् । सोमबहादुर कुमालले ८ सय मिटर दुरी १ मिनेट ५१ दशमलव ४४ सेकेन्डमा पुरा गर्दै कास्य जितेका थिए ।
हरि कुमार रिमालले ५ हजार मिटरको दौडमा १४ मिनेट ५७.०५ सेकेन्डमा दौड पूरा गर्दै कास्य जितेका थिए । दीपक अधिकारीले १० हजार मिटर दौड ३० मिनेट ५०.०६ सेकेन्डमा पूरा गर्दै कास्य जितेका थिए । टंक कार्कीले १५ सय मिटरमा कास्य जितेका थिए ।
