काठमाडौं (हाम्रो खेलकुद) – नेपालको शीर्ष वरीयताका रत्नजित तामाङ र विश्व जुनियर वरीयताको तेस्रो स्थानमा रहेका प्रिन्स दाहाल प्रथम रिभाईभ लिजर पार्क खुल्ला राष्ट्रिय ब्याडमिन्टन च्याम्पियनसिप अन्तरगत पुरुष एकलतर्फको प्रि–क्वाटरफाइनलमा प्रवेश गरेका छन् ।

ललितपुर महालक्ष्मीस्थानस्थित रिभाईव लिजर पार्कको कोर्टमा आइतबार भएको राउन्ड अफ ३२ को खेलमा वाइ पाएर दोस्रो चरण खेलेको रत्नजित तामाङले आर्मीकै आयुष्मान नागरीलाई २१–९ र २१–८ सोझो सेटमा पराजित गर्दै अन्तिम १६ मा स्थान बनाएको हो ।

यस्तै आयोजक लिजर पार्कका प्रिन्स दाहालले कपिलवस्त ब्याडमिन्टन क्लबका रोहित बरालमाथि २१–६ र २१–७ को सोझो सेटमा हराउँदै प्रि–क्वाटरफाइनलमा पुग्न सफल भयो । आर्मीकै पविन लिङ्थेप र प्रफुल महर्जनले पनि अन्तिम १६ मा स्थान बनाएका छन् । पविनले नेपाल एपिफ क्लबका पेम्वा शेर्पालाई २१–१७ र २१–१४ ले तथा प्रफुलले विर्ता ब्याडमिन्टन क्लबका नविन सिलवाललाई २१–१० र २१–८ ले हरायो ।

एपिएफका सुमन लिम्बुले देवीनगर ब्याडमिन्टन क्लबका एडिस कार्कीलाई २१–१५ र २१–११ ले हराए । यस्तै लोकान्तरका सुदिप सेढाईले चितवनका राजु थापामाथि २१–१७ र २१–१२ को सहज जित निकाल्यो ।

काठमाडौं ब्याडमिन्टन एकेडेकीमा दिपन गायकले आफ्नै एकेडेमीका बविस थापालाई १३–२१, २१–१६ र २३–२१ ले पराजित गर्दै अन्तिम १६ मा स्थान बनाउन सफल भयो । पुलिसका पुर्ण बहादुर थापाले भक्तपुर ब्याडमिन्टन एसोसिएसनका विवेक भट्टराईलाई २१–९ र २१–१२ ले हराए ।

पाँचथरका एसिया जवेगुले आर्मीका विवेक चौधरीलाई २१–११ र २१–१५ को सेटमा पाखा लगाए । साइनो स्पोर्ट्सका सुजन थापाले कैलाली ब्याडमिन्टन क्लबका चक्र साउदलाई २१–१६ र २१–१९ ले तथा एपिएफका प्रियान्सु सिंह क्षेत्रीले आफ्नै क्लबका निराजन देवकोटालाई २१–१३ र २१–१५ ले हराए । एपिएफका गौतम सिंह कठायतले पीएफसी ब्याडमिन्टन क्लबका अभिनास कार्कीलाई २१–१२ र २१–१४ ले हराए ।

सेनाका गोकुल जोराले काठमाडौं ब्याडमिन्टन एकेडेमीका स्वयम मानन्धरलाई २१–१२, १७–२१ र २१–१५ ले तथा एपिएफका साजन कृष्ण ताम्रकारले कपिलवस्तुका अभय महरामाथि २१–११ र २१–११ को सोझो सेटमा हराउँदै अन्तिम १६ मा स्थान पक्का गरे ।

आर्मीका रुकेश महर्जनले नेपाल पुलिस क्लबका जीवन आचार्यबाट तथा भोज बहादुर गुरुङले एपिएफका विजित थापामगरबाट वाकओभर पाए । पुरुष युगलतर्फ पनि प्रि–क्वाटरफाइनल समिकरण पुरा भएको छ ।

च्याम्पियनसिपमा पुरुष एकल, महिला एकल, शीर्ष २० देखि बाहेकका पुरुष युगल र ४० बर्ष माथिको भेट्रान्स युगल गरि ४ विधामा खुल्ला प्रतिस्पर्धा हुने छ । करिव १७ लाख अनुमानित बजेट रहेको च्याम्पियनसिपमा विजयी खेलाडी तथा टिमलाई नगद पुरस्कार सहित ट्रफी, मेडल र प्रमाण पत्र प्रदान गरिने छ ।

पुरुष एकल र महिला एकलका विजयी शिर्ष तीनले नगद ५० हजार, २५ हजार र १० हजार प्राप्त गर्ने छन् । यस्तै पुरुष युगलतर्फ शीर्ष तीन स्थान प्राप्त जोडीले नगद ५० हजार, २५ हजार र १० हजार तथा ४५ बर्ष माथिको भेट्रान्स युगलतर्फ शीर्ष तीन जोडीले नगद २५ हजार, १५ हजार र ५ हजार प्राप्त गर्नेछन् । च्याम्पियनसिप ५ असोजसम्म चल्नेछ ।