काठमाडौं (हाम्रो खेलकुद) – नेपालले अर्को बर्ष एसियाली युथ तथा जुनियर भारोत्तोलन च्याम्पियनसिप आयोजना गर्ने भएको छ । जापानको टोकियोमा भइरहेको एसियाली युथ तथा जुनियर भारोत्तोलनका दौरान बुधबार भएको एसियाली भारोत्तोलन महासंघको कार्यकारी बैठकले अर्को संस्करण नेपाललाई आयोजना गर्न दिने निर्णय गरेको हो । नेपाल भारोत्तोलन संघले दिएको जानकारी अनुसार च्याम्पियनसिप २०१७ को जुलाई २१ देखि ३० सम्म हुनेछ ।
नेपालले युथ, जुनियरसँगै सिनियर भारोत्तोलन च्याम्पियनसिप आयोजनाका लागि दाबेदारी प्रस्तुत गरेको थियो । तर, सिनियर च्याम्पियनसिप आयोजनाको जिम्मेवारी भने दक्षिण कोरियाले पाएको छ । बैठकमा दक्षिण एसियाली भारोत्तोलन संघका उपाध्यक्ष एवं एसियाली भारोत्तोलन महासंघका अध्यक्ष मोहम्मद युसुफ अल्मानाका सहायक समेत रहेका नेपाल भारोत्तोलनका अध्यक्ष रतनकुमार टण्डनले भाग लिएका थिए । यसअघि नेपालले सन् २०१५ को अगष्टमा सिनियर एसियाली भारोत्तोलन च्याम्पियनसिप आयोजनाको जिम्मेवारी पाएको थियो । तर, २०७२ साल बैशाख १२ गतेको विनाशकारी भूकम्पका कारण त्यो प्रतियोगिता थाइल्यान्डमा सारिएको थियो ।
