पोखरा (हाम्रो खेलकुद) – तीन गोलले पछि परेको स्थिति उल्ट्याउँदै स्पोर्ट्स क्यासल पोखराले ‘ए’ डिभिजन राष्ट्रिय फुटसल लिगमा ढुकु फुटसल हव काठमाडौंमाथि सानदार जित निकालेको छ ।

पोखराको बहुउद्देश्यीय कभर्डहलमा बिहीबार भएको खेलमा स्पोर्ट्स क्यासलले ढुकुमाथि ५–३ को पूनरागमन जित निकालेको हो । क्यासलको पूनरागमन जितमा खिम राज गुरुङले दुई तथा योगेश गुरुङ, सुमित श्रेष्ठ र दिपेश घलेले गोल गरे । ढुकुका विक्रान्त नरसिंह रानाले दुई तथा उर्केन शेर्पाले गोल गरेपनि हार टार्न सकेन ।

खेलको १०औं मिनेटमा पिभोट विक्रान्त नरसिंह रानाको गोलबाट ढुकुले अग्रता लिएको थियो । १२औं मिनेटमा आला उर्केन शेर्पाले गोल गर्दै ढुकुको अग्रता दोब्बर बनायो । २०औं मिनेटमा विक्रान्तले गोल गरेपछि ढुकुले पहिलो हाफमा ३–० को आरामदायी अग्रता लिएको थियो । तर त्यो अग्रतालाई ढुकुले दोस्रो हाफमा जोगाउन नसक्दा पराजित हुन पुग्यो ।

२२औं मिनेटमा आला योगेश गुरुङले गोल गर्दै स्पोर्ट्स क्यासललाई खेलमा फर्कने संकेत दिए । २७औं मिनेटमा पिभोट खिम राज गुरुङले गोल गर्दै खेललाई ३–२ को अवस्थामा ल्याए । २९औं मिनेटमा आला सुमित श्रेष्ठले गोल गर्दै खेललाई ३–३ गोलको बराबरीमा ल्याए । ३२औं मिनेटमा खिम राज गुरुङले गोल गर्दै स्पोर्ट्स क्यासललाई खेलमा ४–३ को अग्रता दिलाए ।

३६औं मिनेटमा फिक्सो दिपेश घलेले गोल गर्दै स्पोर्ट्स क्यासललाई ५–३ को पूनरागमन जित दिलाए । स्पोर्ट्स क्यासलका खिम राज गुरुङ प्लेयर अफ दि म्याच चुनिए । उनले ५ हजार रुपैया पाए । यो जितसँगै अपराजित रहेको स्पोर्ट्स क्यासल ३ खेलबाट ७ अंक जोडेर दोस्रो स्थानमा रहेको छ । शीर्षस्थानको दि राइजिङ क्लब धरानको ९ अंक छ । पराजित ढुकुको ३ खेलबाट ३ अंक छ ।

यस्तै अर्काे खेलमा सविन मेमोरियल एफसी पोखराले मछिन्द्र स्काई गोल्सलाई ३–२ ले पराजित गरेको छ । सविन मेमोरियलको जितमा अविनाश तामाङले दुई तथा भर्दान लामाले एक गोल गरे । स्काई गोल्सका आशिष सुनामले दुवै गोल गरेपनि हार टार्न सकेन ।

सविन मेमोरियलका अविनाश तामाङ प्लेयर अफ दि म्याच चुनिए । उनले ५ हजार रुपैया पाए । यो नतिजापछि सविन मेमोरियलको ३ खेलबट ६ अंक पुगेको छ । पराजित स्काई गोल्सको ३ खेलबाट ३ अंक छ ।

यस्तै अर्काे खेलमा लुम्विनी फुटसल रुपन्देही र फुटसल फाइभले गोलरहित बराबरी खेल्दै अंक बाँडेका छन् । बराबरीपछि लुम्विनी फुटसलको ३ खेलबाट ४ अंक पुगेको छ । फुटसल फाइभको ५ अंक पुगेको छ । फुटसल फाइभका विजय श्रेष्ठ प्लेयर अफ दि म्याच चुनिए । उनले ५ हजार रुपैया पाए ।

लिगमा शुक्रबार तीन खेल हुनेछ । शंखमुल र राइजिङ, झरना र सविन मेमोरियल तथा प्रभातफेरी र ढुक फुटसल हवबी प्रतिस्पर्धा हुनेछ ।