एजेन्सी – आइसिसी टि२० विश्वकप २०२१ अन्तर्गत सुपर १२ को समूह ए को खेलमा दक्षिण अफ्रिकाले वेस्टइन्डिजविरुद्ध पहिला फिल्डिङ गर्ने भएको छ । दुबई इन्टरनेशल क्रिकेट स्टेडियममा दक्षिण अफ्रिका कप्तान टेम्बा बभुमाले टस जित्दै पहिला फिल्डिङ गर्ने निर्णय लिएका हुन् ।

दुबै टोलीले आजको खेलमा १–१ खेलाडी परिवर्तन गरेका छन् । वेस्टइन्डिजले तीव्र गतिका बलर आवेद म्याकोयको स्थानमा स्पिनर हेडेन वाल्श जुनियरलाई मौका दिएको छ । दक्षिण अफ्रिका प्रमुख ओपनर तथा विकेटकिपर क्विन्टन डि कक टोलीमा छैनन् । डि कको स्थानमा दक्षिण अफ्रिकाले रिजा हेनड्रिक्सलाई मौका दिएको छ । दक्षिण अफ्रिका कप्तान बभुमाले डि कक व्यक्तिगत कारण उपलब्ध नभएको जनाएका छन् ।

वेस्टइन्डिज पहिलो खेलमा इंग्ल्यान्डसँग १४.२ ओभरमा ५५ रनमा अल आउट भएको थियो । उक्त खेलमा वेस्टइन्डिज ६ विकेटले पराजित भएको थियो । साविक विजेता वेस्टइन्डिज दोस्रो खेलमा ब्याटिङ सुधारका साथ जित निकाल्ने सोचमा छ ।

दक्षिण अफ्रिका पनि यस विश्वकपमा पहिलो जितको सोचमा छ । पहिलो खेलमा दक्षिण अफ्रिका अष्ट्रेलियासँग ५ विकेटले पराजित भएको थियो । दक्षिण अफ्रिका पनि पहिलो खेलमा अष्ट्रेलियासँग कमजोर ब्याटिङ गर्दै १ सय १८ रन बनाएको थियो । दक्षिण अफ्रिका आफ्ना प्रमुख ब्याटरबाट उच्च प्रदर्शन चाहन्छ ।

दक्षिण अफ्रिका प्लेइङ ११ : टेम्बा बभुमा (कप्तान), रिजा हेनड्रिक्स, हेनरिक क्लासेन, केशव महाराज, एडेन माक्ररम, डेविड मिलर, एनरिच नोर्किया, डवेन प्यट्रियटर्स, कागिसो रबाडा, तबरेज शाम्सी र रास्सी भान डर डुसेन ।

वेस्टइन्डिजको प्लेइङ ११ : इविन लेविस, लेन्डन सिमन्स, क्रिस गेल, शिम्रन हेटमायर, निकोलस पुरन (विकेटकिपर), काइरन पोलार्ड, आन्द्रे रसेल, ड्वेन ब्राभो, अकिल हुसैन, हेडेन वाल्श जुनियर र रवि रामपाउल ।