काठमाडौं (हाम्रो खेलकुद) – प्रथम प्रकाश दाहाल स्मृति प्रगतिशील युवा नेपाल कप राष्ट्रिय पुरुष भलिबल प्रतियोगिताको फाइनल खेल शनिबार हुने भएको छ ।
वर्षाका कारण लगातार स्थगित भएको खेल मंगलबार हुने भनिएपनि वर्षाकै कारण सम्भव नभएपछि शनिबार सम्मका लागि स्थगित गरिएको प्रतियोगिता संयोजक विकास गुरुङले जानकारी दिए । खेल नयाँ बसपार्कस्थित ढोरपाटन स्पोर्ट्स क्लबको कोर्टमा विहान ८ बजे शुरु हुनेछ । उपाधिका लागि त्रिभुवन आर्मी क्लब र नेपाल पुलिस क्लब भिड्दैछन् । बुधबार र बिहीबार राष्ट्रिय टोलीको छनोट हुने भएकाले खेल शनिबारलाई सारिएको हो ।
पुलिसले नेपाल एपीएफ क्लबलाई पराजित गर्दै फाइनलमा स्थान बनेको थियो । आर्मीले गण्डकीको चुनौती पन्छाउँदै उपाधि भिडन्तमा स्थान पक्का गरेको थियो । सोमबार भएको तेस्रो स्थानको खेलमा गण्डकीले एपीएफलाई ३-२ ले हराएको थियो । गण्डकीले १ लाख रुपैयाँ प्राप्त गर्दा चौथो स्थानको एपीएफले ५० हजारमा चित्त बुझायो ।
विजेता टोलीले ५ लाख रुपैयाँ प्राप्त गर्दा उपविजेताले ३ लाख रुपैयाँ प्राप्त गर्नेछन् । सर्वोत्कृष्ट खेलाडीले मोटरसाइकल र विधागततर्फ उत्कृष्ट खेलाडी र प्रशिक्षकले नगद पुरस्कार प्राप्त गर्नेछन् ।
