काठमाडौं (हाम्रो खेलकुद) – महिला भलिबल खेलाडी कोपिला उप्रेती नेदरल्यान्ड प्रस्थान गर्ने भएकी छिन् । कोपिला नेदरल्यान्ड भलिबल फेडेरेसन (नेभोवो) र डच मिनिस्ट्री अफ फरेन एफयर्सलेले आफ्नै बारेमा बनाएको वृत्तचित्र सार्वजनिक गर्ने कार्यक्रमका लागि शनिबार त्यसतर्फ प्रस्थान गर्न लागेकी हुन् ।
कोपिलाको वृत्तचित्र २३ सेप्टेम्बरमा युरोपियन च्याम्पियनसिप मेन्स भलिबल प्रतियोगिताको फाइनल दौरान सार्वजनिक हुनेछ । ३ अक्टोबरमा अन्तर्राष्ट्रिय भलिबल महासंघ (एफआइभीवी) को हेडक्वाटर स्वीट्जरल्यान्डको लसाउनेमा उक्त भिडियो सार्वजनिक गरिनेछ ।
भिडियोमा लामो समयमा महिला भलिबलमा बिताएको र ग्रामीण भेगबाट भलिबल सिक्दै राष्ट्रिय टोलीसम्म आइपुगेको तथा अन्तर्राष्ट्रिय प्रतियोगितामा सहभागिताको विषयलाई उठाइएको छ । यस भिडियो नयाँ पुस्तालाई खेलमा लाग्नको लागि थप प्रेरणा मिल्ने विश्वास कोपिलाको छ ।
अर्नाे डि क्लोइट अफ क्रिएटिभ फाइभले कोपिलाको भिडियो निर्माण गरेका हुन् । भिडियाको लागि नेभोवो र नेपाल भलिबल संघले पनि सहयोग गरेको छ । यो कार्यक्रमको नेतृत्व (एफआइभीवि) का इन्स्ट्रक्टर लेभल ४ कोच लेस्ली डि जङ र लेभल ५ कोच रीता बुइकेमाले गरेका छन् ।
