ढाका (हाम्रो खेलकुद) – बंगलादेशमा जारी प्रथम एभीसी एसियन सेन्ट्रल जोन सिनियर महिला भलिबल च्याम्पियनसिप अन्तर्गत उपाधिको दावेदार नेपालले आज (आइतबार) प्रतियोगिताको पहिलो खेलमा आफगानिस्तानसँग खेल्दैछ ।

खेल नेपाली समयअनुसार मध्यान्ह १२ः४५ बजे मिरपुरस्थित शाहिद शुरवार्दी इन्डोर स्टेडियममा हुनेछ । तुलनात्मक रुपमा कमजोर प्रतिद्वन्द्वी अफगानिस्तानलाई सहजै पराजित गर्दै नेपाल प्रतियोगिताको सुखद शुरुवात गर्ने लक्ष्यमा हुनेछ । अफगानिस्तान पहिलो खेलमा आयोजक बंगलादेशसँग २५–९, २५–९ र २५–३ को सोझो सेटमा पराजित भएको थियो ।

सोही कारण पनि नेपाली राष्ट्रिय टोलीका मुख्य प्रशिक्षक जगदिश भट्टले टोलीमा समावेश सबै नयाँ ६ खेलाडीलाई डेब्यु गराउने सम्भावना छ । टोलीमा निरुता ठगुन्ना, सोफिया पुन, सुनिता खड्का, जानकी भण्डारी, सलिना श्रेष्ठ र पुनम चन्द नयाँ अनुहार हुन् । अरुणा शाही, प्रतिभा माली, सरस्वती चौधरी, रेश्मा भण्डारी, कमला पुन र उषा विष्ट राष्ट्रिय टोलीका पुराना खेलाडी हुन् ।

नेपाली टोलीले अरुणाा शाहीको कप्तानीमा झन्डै २वर्षपछि पहिलो अन्तर्राष्ट्रिय खेल खेल्नेछ । नेपाली महिला राष्ट्रिय टोलीले पछिल्लाेपटक २०१८ जनवरीमा  एफआईभिवी  सेेेेेेेेेेेेेेेेेेन्ट्रल जाेन वल्ड छनाेट खेल खेलेकाे थियाे  । त्यसयता नेपाली टाेलीले अन्तर्राष्ट्रिय प्रतियोगिता खेलेको छैन । नेपाली टोलीका मुख्य प्रशिक्षक जगदिश भट्टले विपक्षीलाई कहिल्यै कमजोर नआक्ने र लक्ष्य सेन्ट्रल जोनमा स्वर्णपदक जित्ने रहेको बताएका छन् ।

नेपाली टोली सागको लागि विगत चार महिनायता नियमित प्रशिक्षणमा रहेको छ । टोलीले तीन साता थाइल्यान्डमा प्रशिक्षणका साथै अभ्यास खेल खेल्ने मौका पाएका थियो । नेपालले सोमबार किर्गिस्तानसँग, मंगलबार आयोजक बंगलादेशसँग र बुधबार माल्दिभ्ससँग खेल्ने छ ।

आजै दोस्रो खेलमा आयोजक बंगलादेश र माल्दिभ्सबीच प्रतिस्पर्धा हुदैछ । दुवै टोलीले शनिबार सफलता हात पारेका थिए । पहिलो दिन शनिबार माल्दिभ्सले किर्गिस्तानमाथि ३–२ को तथा आयोजक बंगलादेशले अफगानिस्तानमाथि ३–० को सोझो सेटमा जित हात पारेको छ ।

राउन्ड रोविन लिगको शीर्ष दुई टोलीले उपाधिका लागि नोभेम्वर १४ मा खेल्नेछ । सोही दिन तेस्रो र चौथो स्थानको प्ले अफ हुनेछ । च्याम्पियनसिपमा नेपालसहित आयोजक बंगलादेश, अफगानिस्तान, माल्दिभ्स र किर्गिस्तानको सहभागिता रहेको छ । च्याम्पियनसिपका सबै खेलहरु शाहिद शुरवार्दी इन्डोर स्टेडियम मिरपुर ढाकामा हुनेछ ।

नेपाली टोली : अरुणा शाही (कप्तान), प्रतिभा माली, सरस्वती चौधरी, रेश्मा भण्डारी, निरुता ठगुन्ना, जानकी भण्डारी, सोफिया पुन, उषा विष्ट, सुनिता खड्का, कमला पुन, पुनम चन्द र सलिना श्रेष्ठ

जगदिश भट्ट – मुख्य प्रशिक्षक

सलिना श्रेष्ठ – प्रशिक्षक

भरत यादव –प्रशिक्षक

रीता कोइराला – व्यवस्थापक