काठमाडौं (हाम्रो खेलकुद) – पूर्व राष्ट्रिय भलिबल खेलाडी परीक्षा गुरुङले आसन्न १३औं दक्षिण एसियाली खेलकुद (साग) अन्तरगतको बिच भलिबल टोलीलाई जर्सी सौजन्य गरेकी छिन् ।
हाल बेलायतमा रहेका गुरुङले आफु संलग्न अल्डरसट भलिबल क्लबको तर्फबाट बिच टोलीलाई १२ सेट जर्सी सौजन्य गरेकी हुन् ।
उनले इन्डोर भलिबल खेलाडीलाई पनि निक्याप र जर्सी निशुल्क उपलब्ध गराएको बिच भलिबल प्रशिक्षक कौशिला खत्रीले जानकारी दिइन् ।
बिच भलिबल टिमलाई उनका बुवा खर्कमान गुरुङ र आमा गीतादेवी गुरुङले जर्सी हस्तान्तरण गरेका थिए । बिच महिला टिमकी प्रशिक्षक कौशिला खत्रीले विदेशमा रहेर पनि आफ्नो खेलाडीलाई यसरी सम्झिएकोमा खुशी व्यक्त गरिन् ।
उनी बेलायत जानुअघि ज्ञानुबाबा स्कुल, टप्स मावि र पश्चिमाञ्चलबाट आफ्नो खेल कला देखाएकी थिइन् । उनी अहिले बेलायतको अल्डरसटबाट भलिबल खेल्ने गर्छिन् ।
