काठमाडौं (हाम्रो खेलकुद)– राष्ट्रिय महिला भलिबल टोलीकी कप्तान अरुणा शाहीले आयोजक न्यू डायमण्ड क्लबबाट होङ्गान्जी न्यु डायमन्ड खुला महिला भलिबल प्रतियोगिता खेलिरहेकी छिन् ।

बालाजु बसपार्क नजिकको कोर्टमा जारी प्रतियोगितामा न्यू डायमन्डले नेपाल पुलिस क्लबसँग प्रतिस्पर्धा गरिरहेको छ । प्रतियोगिताका सुरुवाती दुई खेलमा नेपाल एपिएफ र त्रिभुवन आर्मी क्लब विजयी भएका छन् ।

पश्चिमाञ्चलबाट खेल्दै आएकी अरुणाको टोली न्यु डायमन्डमा सहभागी नभएपनि उनी न्यु डायमन्डमा आबद्ध भएकी हुन् ।’ हिजो बेलुका मात्र अरुण खेल्न तय भएको हो, क्लबकी अध्यक्ष सुनकेशरी मालीले भनिन्, ‘अहिलेका लागि यो प्रतियोगिता हामी कहाँबाट खेल्ने भन्ने हो । हाम्रो प्रयास लामो समय क्लबबाट खेलाउने हुन्छ । थप छलफल पछि गर्छौ ।’

अरुणाले यसअघि पनि न्यु डायमन्डबाट खेलिसकेकी छिन् । त्यति बेला उनका साथमा पश्चिमाञ्चलकै मन्जु गुरुङले पनि खेलेकी थिइन् । अरुणाको कप्तानीमा नेपाली टोलीले पछिल्लो ३ महिनामा दुई ठूला सफलता हासिल गरेको थियो ।

कात्तिकमा बंगलादेशमा भएको एभिसी सेन्ट्रल जोनमा स्वर्ण पदक जितेको नेपाली टोलीले गत महिना स्वदेशमा सम्पन्न १३ औं दक्षिण एसियाली खेलकुद (साग) मा रजत पदक जितेको थियो । सागको ३५ वर्षे इतिहासमा नेपालले रजत पदक जितेको त्यो पहिलो पटक हो ।