काठमाडौं (हाम्रो खेलकुद) – भलिबल खेलाडी विनिता बुढाथोकी र चन्द्रबहादुर कुँवर सञ्जय स्मृति प्रतिष्ठानद्धारा सम्मानित भएका छन् ।

बिहीबार काठमाडौंमा एक कार्यक्रमकाबीच प्रतिष्ठानले विनिता र चन्द्रबहादुरलाई रु ३०-३० हजार रुपैयाँले सम्मान गरेको छ ।

सन् १९९९ देखि हाल सम्म देशको प्रतिनिधित्व गर्दै दक्षिण एसियाली खेलकुद (साग) मा तीन पटक (सन् १९९९,२००६ र २०१६) कास्य पदक जित्दा पछिल्लो दुई पटक कप्तानको समेत जिम्मेवारी निर्वाह गर्नुको साथै घरेलु भलिबलमा सुरुमा पूर्वाञ्चल र पछिल्लो सात बर्षदेखि नेपाल एपिएफ क्लबबाट उच्च प्रदर्शन गरेको भन्दै विनितालाई सम्मान गरेको हो । विनिताले मंसिरमा सम्पन्न १३ औं सागमा बीच भलिबलमा कास्य पदक जितेकी थिइन् ।

त्यस्तै २०१३ देखि २०१६ सम्म १२ औं  साग सहित विभिन्न अन्तर्राष्ट्रिय प्रतियोगितामा देशको प्रतिनिधित्व गनुको साथै एक दशक भन्दा लामो समयदेखि राष्ट्रिय टोली र क्लबका माध्यमबाट भलिबलमा पु¥याएको योगदानको कदर गर्दै चन्द्रबहादुरलाई सञ्जय स्मृति प्रतिष्ठान प्रदान गरेको जनाएको छ ।

त्यस्तै प्रतिष्ठानले गत महिना एआईपिएस स्पोर्टस मिडिया अवार्डअन्तर्गत बेष्ट कोलम राइटिङमा पहिलो स्थान प्राप्त गरको दी काठमाडौं पोष्टका खेलकुद पत्रकार प्रज्वल ओलीलाई पनि सम्मान गरेको छ ।

यसैबीच प्रतिष्ठानले गत कात्तिकमा बंगलादेशमा सम्पन्न प्रथम एभीसी एसियन सेन्ट्रल जोन सिनियर मेन्स भलिबल च्याम्पियनसिपमा उपाधि तथा काठमाडौंमा गत मंसिरमा समपन्न १३औं सागमा रजतपदक जित्न सफल नेपाली राष्ट्रिय महिला भलिबल टोलीलाई सम्मानपत्रले सम्मानित गरेको छ । यस्तै १३औं सागको बिच भलिबलको पुरुगा तथा महिला टोलीलाई पनि प्रतिष्ठानले सम्मानित गरेको छ ।