नेपालगन्ज (हाम्राे खेलकुद) – काठमाडौंको होङ्ग्वान्जी न्यु डायमन्ड स्पोर्ट्स क्लब नेपालगन्जमा जारी छैटौं संस्करणको प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको सेमिफाईनलमा प्रवेश गरेको छ।

नेपालगन्जस्थित कभर्डहलमा सोमबार भएको समूह चरणको दोेस्राे खेलमा आयोजक प्रदेश ५ माथि ३-० को सोझो सेटमा जित निकाल्दै डायमन्ड अन्तिम चारमा पुग्न सफल भएको हो । आइतबार पहिलो खेलमा विभागिय नेपाल पुलिस क्लबसँग ३-० को सोझो सेटमा पराजित भएको डायमन्डले आयोजकमाथि २५-९, २५-१३ र २५-११ को सहज जित हात पारेको हो ।

आजै साँझ ५ बजे नेपाल पुलिस क्लब र आयोजकबीच प्रतिस्पर्धा हुनेछ । उक्त खेलमा जित हात पारे पुलिस समूह बी को विजेता बन्नेछ ।

समूह ए बाट साविक विजेता नेपाल एपिएफ क्लब र त्रिभुवन आर्मीले अन्तिम चारको यात्रा तय गरिसकेका छन् । समूह ए मा भारतिय टोली नआएपछि एपिएफ र आर्मीले सिधै सेमिफाइनल पुग्न सफल भएको थियो ।

अब सेमिफाइनलमा पुलिस र आर्मी तथा एपिएफ र डायमन्डबीच प्रतिस्पर्धा हुनेछ । सेमिफाइनल मंगलबार तथा फाइनल र तेस्राे स्थानको लागि बुधबार प्रतिस्पर्धा हुने आयोजकले जनाएको छ।

आइतबारबाट सुरु भएको प्रतियोगितामा घरेलु भलिबलका चर्चित ४ क्लब नेपाल एपिएफ, नेपाल पुलिस क्लब, त्रिभुवन आर्मी क्लब, होङग्वानी न्यू डायमण्ड स्पोर्टस् क्लबसहित आयोजकको एउटा टोली गरी ५ टोलीको सहभागिता रहेको छ ।