नेपालगन्ज (हाम्रो खेलकुद) – विभागीय नेपाल पुलिस क्लब समूह विजेता बन्दै नेपालगन्जमा जारी छैटौं संस्करणको प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको सेमिफाइनलमा प्रवेश गरेको छ ।

पुलिस अपराजित रहेर समूह ‘बी’ बाट समूह विजेता बन्दै सेमिफाइनलमा पुग्न सफल भएको हो । सोमबार भएको समूहको अन्तिम खेलमा पुलिसले आयोजक प्रदेश नम्वर ५ माथि ३–० को सोझो सेटमा पराजित गर्दै समुह विजेता बनेको हो ।

नेपालगन्जस्थित कभर्डहलमा सोमबार भएको समूह चरणको दोेस्रो खेलमा आयोजकमाथि २५–९, २५–१५ र २५–११ को सहज जित निकालेको हो ।

यसअघि पुलिसले आइतबार होङ्ग्वान्जी न्यु डायमन्ड स्पोर्ट्स क्लबमाथि पनि ३–० को सोझो सेटमा जित निकालेको थियो । यो समूहबाट डायमन्ड समूह उपविजेता बन्दै सेमिफाइनलमा पुग्न सफल भयो ।

यससँगै प्रतियोगिताको सेमिफाइनल समिकारण पूरा भएको छ । अब सेमिफाइनलमा समूह ‘ए’ को विजेता एपिएफ र समूह ‘बी’ को उपविजेता डायमन्ड तथा समूह ‘बी’ को विजेता पुलिस र समुह ‘ए’ को उपविजेता आर्मीबीच खेल हुनेछ । दुवै सेमिफाइनल मंगलबार हुनेछ ।

समूह ‘ए’ मा भारतीय टोली नआएपछि एपिएफ र आर्मीले वाइ पाएर सिधै सेमिफाइनल पुग्न सफल भएको थियो । फाइनल र तेस्रो स्थानको लागि बुधबार प्रतिस्पर्धा हुने आयोजकले जनाएको छ ।

त्यसअघि सोमबारै डायमन्डले आयोजकमाथि २५–९, २५–१३ र २५–११ को सहज जित निकालेको थियो ।

आइतबारबाट सुरु भएको प्रतियोगितामा घरेलु भलिबलका चर्चित ४ क्लब नेपाल एपिएफ, नेपाल पुलिस क्लब, त्रिभुवन आर्मी क्लब, होङ्ग्वान्जी न्यू डायमण्ड स्पोर्टस् क्लबसहित आयोजकको एउटा टोली गरी ५ टोलीको सहभागिता रहेको छ ।

प्रतियोगिताको विजेताले २ लाख रुपैया हात पार्नेछ । दोस्रो हुनेले १ लाख रुपैया तथा तेस्रो हुनेले ५० हजार प्राप्त गर्ने छ । प्रतियोगिताको सर्वोत्कृष्ट खेलाडीले २५ हजार रुपैयाँ प्राप्त गर्नेेछन् ।