पोखरा (हाम्रो खेलकुद)– कोरोना भाइरस कोभिड १९ का कारण सरकारले चैत्र ११ गते देखि लकडाउन सुरु गरेको थियो । सरकारले कोरोनाको न्यूनिकरणका लागि भन्दै घोषणा गरेको थियो । असार १ गतेबाट लक डाउनको स्वरुप परिवर्त भएको छ । जसले गर्दा पोखरा रंगशालामा खेल गतिविधि सुरु हुन थालेको छ ।

जिल्ला खेलकुद विकास समिति कास्कीले चैतको पहिलो सातादेखि नै पोखरा रंगशालाभित्र कुनै गतिविधि नगर्न निर्देशन दिदैँ सूचना जारी गरेको थियो । लकडाउन गर्नु अघि नै राष्ट्रिय खेलकुद परिषद (राखेप) को निर्देशन अनुसार रंगशालाभित्र कुनै पनि खेलकुद गतिविधि नगर्न जिल्ला खेलकुद विकास समिति कास्कीले सर्वसाधारणको लागि मुख्य प्रवेशद्वारमै सूचना टाँस गरेको थियो ।

अहिले रंगशाला प्रवेश गर्नेको ज्वरो नाप गरी प्रवेश गर्न दिइएको छ । सरकारले बढि भिडभाड हुने स्थान भन्दै तत्कालका लागि खेलकुद गतिवधि नगर्न निर्देशन जारी गरेको छ । तर पोखरा रंगशालामा भने भित्री रुपमा तालिम सुचारु हुन थालेका छन् । लकडाउनको समयमा खेलाडीलाई पोखरा रंगशाला हाता भित्र प्रशिक्षण गर्न समेत रोक लगाएको छ ।

अहिले भने पोखरा रंगशालाभित्र अहिले टेनिस, ब्याडमिन्टन, क्रिकेट, बास्केटबल र करातेको प्रशिक्षण सुरु भएको छ । कास्की जिल्ला खेलकुद विकास समिति कास्कीका कार्यालय प्रमुख प्रकाश बरालले सरकारले निर्णय गरेको बाहेक अन्य खेल नखेल्न आग्रह गर्दै भने, सरकारले व्यक्तिगत इभेण्ट बाहेक समुहगत खेलिने कुनै पनि खेलको लागि खुल्ला हुने छैन ।