धनगढी (हाम्रो खेलकुद) – धनगढीमा अर्को महिना हुने दोस्रो कैलाली अस्पताल सुदूरपश्चिम स्पोर्टस अवार्डको सह प्रायोजकको रुपमा सुदूर फुड ईन्डष्ट्रिज आबद्ध भएको छ । नेपाल खेलकुद पत्रकार मञ्च कैलाली समन्वय शाखाले आयोजना गर्ने अवार्डका लागि बिस्कुट उत्पादन गर्दै आएको सुदूर फुडले सह प्रायोजकको रुपमा सहयोग गर्ने भएको हो ।
कैलाली मञ्चका सल्लाहकार दिपक उपाध्याय र सुदूर फुडका प्रबन्ध निर्देशक कबिस अग्रवाल र निर्देशक पियुस अग्रवाल बीच प्रायोजन सम्बन्धी सम्झौता पत्रमा हस्ताक्षर भएको छ । कैलालीको गेटामा रहेको सुदूर फुडले बिस्कुट, कुकिज, फ्रुट केक र रस उत्पादन गर्दै आएको छ ।
उद्योगले सामाजिक उत्तरदायित्व वहन गर्दै प्रदेशको गौरव बढाउने खेलाडीलाई सम्मान गरिने कार्यक्रममा जोडिएको सुदूर फुडजका प्रबन्ध निर्देशक अग्रवालले बताए । धनगढीमा हुने दोस्रो सुदूरपश्चिम स्पोर्टस अवार्डको मुख्य प्रायोजक धनगढीको कैलाली अस्पताल रहेको छ ।
अवार्डमा बर्ष पुरुष खेलाडीलाई नवजीवन अस्पताल, वर्ष महिला खेलाडीलाई नोभा अस्पताल, पिपुल च्वाईस अवार्डलाई वनदेवी युवा क्लब र बर्ष युवा खेलाडीलाई निसर्ग अस्पतालले प्रायोजन गरेको छ ।
त्यसैगरी स्पेशल अवार्डलाई न्यू सिटी पोलिक्लिनिक, लाईफटाईम एचिभमेन्ट अवार्डलाई सारथी अस्पताल, सुदूरपश्चिम आईकन पुरुषलाई माया मेट्रो अस्पताल र महिलालाई तिवारी मेडिसिनले प्रायोजन गरेका छन् ।
अवार्डको प्रवद्र्धकमा धनगढी उपमहानगरपालिका र सुदूरपश्चिम सरकारको सामाजिक विकास मन्त्रालय रहेको छ । धनगढीको ओम प्यालेस अवार्डको भेनु पार्टनर रहेको छ भने गुरुकुल सेक्युरिटीले पनि अवार्डलाई साथ दिएको छ ।
अवार्डमा वर्ष २०७६ मा गरेको प्रदर्शनका आधारमा उत्कृष्ट पुरुष खेलाडी, उत्कृष्ट महिला खेलाडी, उत्कृष्ट युवा खेलाडी, उत्कृष्ट प्रशिक्षक, उत्कृष्ट पारा खेलाडी र वर्षको उत्कृष्ट टिम तथा खेलकुदमा पु¥याएको विशेष योगदानको कदर स्वरुप स्पेसल अवार्ड, पूरा जीवन खेलकुदमा समर्पित गर्ने एक पाका खेलकर्मीलाई लाइफटाइम अचिभमेन्ट अवार्ड, समर्थकको मतका आधारमा दिइने पिपल्स च्वाइस अवार्ड गरी ९ विधामा खेलाडी तथा खेलकर्मीलाई पुरस्कृत गरिनेछ ।
अवार्डको उत्कृष्ट खेलाडी पुरुष र महिला, उत्कृष्ट प्रशिक्षक र पिपल्स च्वाइस अवार्ड गरी ४ विधाका विजेताले समान ३० हजार रुपैयाँ प्राप्त गर्नेछन् । वर्ष युवा खेलाडी, स्पेसल अवार्ड, लाईफ टाइम एचिभमेन्ट अवार्डका विजेताले समान २५ हजार रुपैयाँ पाउनेछन् ।
त्यस्तै सुदूरपश्चिम आईकन महिला र पुरुष विधाका विजेताले समान २० हजार रुपैयाँ प्राप्त गर्नेछन् । धनगढीको ओम प्यालेसमा हुने अवार्ड कार्यक्रम डिसहोम एक्सन स्पोर्टस र धनगढीका स्थानीय संचार माध्यमबाट प्रत्यक्ष प्रसारण गर्ने बताइएको छ ।
