काठमाडौं (हाम्रो खेलकुद) – फ्रान्सका लानिर एलेक्स मिचेललाई पराजित गर्दै नेपाली ब्याडमिन्टनका युवा स्टार प्रिन्स दाहाल थाइल्यान्डको बैंककमा जारी योनेक्स सिंगा–रोजा बिटिवाई इन्टरनेशनल च्याम्पियनसिपको ब्वाइज यु–१७ को क्वाटरफाइनलमा प्रवेश गरेका छन् ।
बैंककमा शुक्रबार भएको प्रि–क्वाटरफाइनलमा प्रिन्सले लानिर एलेक्स मिचेललाई २–० को सोझो सेटमा पराजित गर्दै अन्तिम आठमा पुग्न सफल भएका हुन् ।
निकै नै रोमाञ्चक र प्रतिस्पर्धात्मक बनेको खेलमा प्रिन्सले पहिलो सेट २१–१९ ले जितेको थियो । प्रतिस्पर्धात्मक बनेको दोस्रो सेट प्रिन्सले २३–२१ ले जित्न सफल भयो । अब प्रिन्सले क्वाटरफाइनलमा थाइल्यान्डका खेलाडीसँग शनिबार प्रतिस्पर्धा गर्नेछ ।
प्रिन्सले यसअघि पहिलो राउन्डमा जापानका, दोस्रो राउन्डमा थाइल्यान्डका र तेस्रो चरणमा मलेसियाका खेलाडीलाई पराजित गरेका थिए । प्रिन्सको प्रशिक्षक र व्यवस्थापकका रुपमा उनका मामा कमलेस निरौला रहेका छन् ।
