काठमाडौं (हाम्रो खेलकुद)- नेपाली सेनाका रत्नजित तामाङ र राष्ट्रिय च्याम्पियन एपिएफका दिपेश धामी योनेक्स सनराईज नवौं पुष्पलाल स्मृति ¥याङकिङ राष्ट्रिय ब्याडमिन्टन प्रतियोगिताको सेमिफाइनलमा प्रवेश गरेका छन् । इटहरी रंगशालास्थित कभर्डहलमा बिहीबार भएको क्वाटरफाइनलमा नेपाल नम्बर एक रत्नजितले पुलिसका सुनिल जोशीलाई २१–१० र २१–१३ को सोझो सेटमा पराजित गर्दै अन्तिम चारको यात्रा तय गरेका हुन् ।

 

अव उनले फाइनल प्रवेशका लागि सेनाकै नविन श्रेष्ठको सामना गर्ने छन् । नविनले आफ्नै क्लबका प्रफुल महर्जनलाई १३–२१, २१–११ र २१–१५ ले पाखा लगाए । यस्तै एपिएफका दिपेशले सेनाका रुकेश महर्जनमाथि २१–१६ र २१–१६ को जित निकाल्दै सेमिफाइनलमा पूर्व राष्ट्रिय च्याम्पियन भोजपुरका विकास श्रेष्ठसँगको भेट पक्का गरे । विकासले पुलिसका जीवन आचार्यमाथि २१–७, १८–२१ र २१–११ को जित निकाल्यो ।

पुरुष एकल खुल्लातर्फ सेनाका पविन लिनथेप, एपिएफका प्रियान्सु सिंह क्षेत्री, कैलालीका देवराज राना र एपिएफका निराजन देवकोटाले अन्तिम चारमा स्थान बनाए । महिला युगलमा भोजपुरकी सीता राई र लोक्तमा राईको जोडीले रुपन्देहीका सुन्दरी थारु र पुजा बिष्टलाई २१–१९ र २१–१९ ले पराजित गर्दै विजयी सुरुवात गरेका छन् । कैलालीकी प्रार्थना देउवा र एलिना तिवारीको जोडी र बाँके÷मोरङ्गका सम्झना शर्मा र सिमा राजबंशीको जोडीले वाकओभर पाए ।

छात्र यु–१७ एकलतर्फ कैलालीका अमृत चौधरी, सेनाका भोजबहादुर गुरुङ, एपिएफका प्रियान्सु सिंह क्षेत्री र कञ्चनपुरका हिमाल चन्दले अन्तिम चारमा स्थान बनाए । नेपाल खेलकुद महासंघ अन्तरगतको राष्ट्रिय ब्याडमिन्टन संघको आयोजनामा भएको प्रतियोगिताको महिला एकल खुल्लातर्फ जेष्ट ब्याडमिन्टन एकेडेमीकी मनिषा खड्का, बाँकेकी सुष्मा श्रेष्ठ, कैलालीकी प्रार्थना देउवा र जेष्ट ब्याडमिन्टनकी सफी खत्रीले सेमिफाइनलमा स्थान बनाइन् ।

भेट्रान्स जोडीतर्फ सेनाका सुभाष श्रेष्ठ र रुद्र थिङको जोडी, इलामका दर्शन भक्तराज र सञ्जय भक्तराज, धनकुटाकी किरण प्रधान र योगश्वर श्रेष्ठ तथा पाल्पाका विरेन्द सिंह बिष्ट र महेश बज्राचार्यको जोडी पनि सेमिफाइनलमा प्रवेश गरे ।