धरान (हाम्रो खेलकुद)- सन्तोषी श्रेष्ठले धरान १० के महिलातर्फको उपाधि जितेकी छन् ।

पोखरामा‌ हाफ म्याराथनको उपाधि जितेको एक सातामा शनिबार धरानमा भएको १० किमीमा सन्तोषी पहिलो भएकी हुन् । सन्तोषीले ३८ मिनेट ०८ सेकेन्डमा दौड पूरा गर्दै उपाधि जितेकी हुन् ।

छेन्बीमाया माया राई (४४ मिनेट ०२ सेकेन्ड) दोस्रो र इन्द्रकला नेम्वाङ (४४ मिनेट २८ सेकेन्ड) तेस्रो भइन् ।

सन्तोषीले गत महिना बंगलादेशमा भएको बंगबन्धुमा दक्षिण एसियालीतर्फ म्याराथनको उपाधि जितेकी थिइन्। उनको त्यो म्याराथनमा डेब्यू थियो। ४ वर्ष अघि स्वदेशमा‌ भएको १३ औं दक्षिण एसियाली खेलकुदमा‌ सन्तोषीले १० हजार मिटर दौडमा स्वर्ण पदक जितेकी थिइन्।

पुरुषतर्फ केन्याका जुलियस मुरुकीले उपाधि जितेका छन् । मुरुकीले ३२ मिनेट ५० सेकेन्डमा दौड पूरा गर्दै उपाधि जितेका हुन् । उनले गत साता पोखरा म्याराथनको उपाधि जितेका थिए। १० केमा प्रशान्त तामाङ (३४ मिनेट) दोस्रो र पवन राई (३४ मिनेट ११ सेकेन्ड) तेस्रो भएका छन् ।

भेट्रान्सतर्फ रेव दाहालले विजयी भएका छन्। ३९ मिनेट १५ सेकेन्डमा दौड पूरा गर्दै रेवतले उपाधि जितेका हुन्।
कर्मा शेर्पा (४२ मिनेट ४२ सेकेन्ड) दोस्रो र प्रविण राई (४४ मिनेट ४८ सेकेन्ड) तेस्रो भए ।

तिलविक्रम सम्बाहाम्फेले सुपर भेट्रान्सको‌ उपाधि जितेका छन्। तिलविक्रमले ४४ मिनेट १९ सेकेन्डमा दौड पूरा गरेका थिए। वीरेन्द्र लिम्बु (५० मिनेट ३४ सेकेन्ड) दोस्रो र वीरमान तामाङ (५३ मिनेट २७ सेकेन्ड) तेस्रो भएका थिए।

१० केका दुबैतर्फका विजेताले ६० हजार, दोस्रोले ४० हजार र तेस्रोले २० हजार रुपैयाँ प्राप्त गरेका छन् । विभिन्न विधामा गरि झन्डै ३ हजार ७ सयले भाग लिएका थिए।