काठमाडौं (हाम्रो खेलकुद)- धारा नेपालगन्ज म्याराथनकाे ४ सदस्यीय पदाधिकारी टाेली बिहीवार थाइल्यान्ड प्रस्थान गरेको छ ।

थाइल्यान्डको राजधानी बैंकक नजिकैको ठूलो सहर ब्याङ्सेनमा शुक्रवार हुने एसिया राेड रेस फाेरममा भाग लिन अध्यक्ष टीएस ठकुरी, सदस्य जनक नेपाल, कपिल थापा र कुमार शमशेर थापा बैंकक तर्फ प्रस्थान गरेका हुन् ।

सुर्खेतनिवासी कुमार थापा धारा नेपालगन्ज म्याराथनकै भगिनी इभेन्ट ज्ञान कर्णाली हाफ म्याराथनका सदस्य सचिव हुन् ।

एसियाकाे प्रतिष्ठित ब्याङ्सेन १० किमि राेड रेस अघि हुने एसियाली दाैड सम्मेलनमा नेपालबाट धारा नेपालगन्ज म्याराथनले दाेस्राेपटक सहभागिताकाे अवसर पाएकाे हाे । यसअघि गत बर्ष थाइल्यान्डको हातएईमा संस्थापक अध्यक्ष ठकुरीले भाग लिएका थिए ।

थाइल्यान्डमा रनिङ इभेन्ट आयाेजकहरुकाे साझा संस्था थाइल्यान्ड मास स्पाेर्ट्स पार्टिसिपेन्ट एसाेसियसनले हरेक बर्ष फरकफरक सहरमा एसिया राेड रेस फाेरम आायाेजना गर्दै आएको छ ।

पूर्वी एसियाली देशहरूलाई लक्षित गरि आयाेजना हुने फाेरममा विश्व प्रतिष्ठित विज्ञहरूसँग अन्तरक्रिया गराइन्छ । फाेरम लगत्तै एक्स्पाे भ्रमणको अवसर रहेकोले केही सिक्ने अवसर प्राप्त हुनेछ ।

रेस नेपालले यो बर्षदेखि काठमाडौं २५के नेपाल हेरिटेज रन तथा नेपाल इन्टरनेसनल रनिङ कन्फ्रेन्स यही जेठ २३ र २४ गते काठमाडौंमा गर्दैछ ।

साथै विश्व म्याराथनकाे साझा संस्था एसाेसियसन अफ इन्टरनेसनल म्याराथन एण्ड डिस्टेन्स रेस(एम्स)काे बाेर्ड बैठककाे आतिथ्यता गर्दैछ । आइतबार बिहान आयोजना हुने ब्याङ्सेन १० किमि रेस अवलोकन पश्चात् टाेली नेपाल फर्कनेछ ।