काठमाडौं (हाम्रो खेलकुद)– नेपाल एपिएफकी पुष्षा भण्डारी र त्रिभुवन आर्मी क्लबका गजेन्द्र राईले प्रथम किसुन जी स्मृति हाफ म्याराथनको उपाधि जितेका छन् ।

नेपाल लोकतान्त्रिक खेलकुद बागमती प्रदेशको आयोजना भएको हाफ म्याराथनको महिलातर्फ १ घन्टा २३ मिनेट ३७ सेकेन्डमा दौड पूरा गर्दै पुष्पाले उपाधि जितेकी हुन् । १३ औं दक्षिण एसियाली खेलकुद (साग) को म्याराथनतर्फ रजत पदक विजेता पुष्षाको यो वर्षको चौथो उपाधि हो । मंसिरमा नेपालगन्जमा हाफ म्याराथन जितेकी उनले बंगलादेशमा म्याराथन र गत महिना प्रधानसेनापति म्याराथनमा हाफ म्याराथनको उपाधि जितेकी थिइन् ।

पुरुषतर्फका विजेता राईले १ घन्टा ६ मिनेट ५१ सेकेन्डमा दौड पूरा गरेका थिए । पुरुषतर्फ शीर्ष ५ मा आर्मीकै खेलाडी रहन सफल भएन । खगेन्द्र भाटले १ घन्टा ७ मिनेट २० सेकेन्डमा दौड पूरा गर्दै दोस्रो भए । रामजी बस्नेत १ घन्टा ९ मिनेट ३९ सेकेन्ड समयका साथ तेस्रो भए । देवराज बस्नेत (१ घन्टा १० मिनेट २९ सकेन्ड) चौथो र जितेन्द्र अधिकारी दनुवार (१ घन्टा ११ मिनेट ४३ सेकेन्ड) पाँचौं भए ।

महिलातर्फ आर्मीकी पूर्णलक्ष्मी न्यौपाने दोस्रो भइन् । उनले १ घन्टा २८ मिनेट ४१ सेकेन्डमा दौड पूरा गरिन् । १ घन्टा ३६ मिनेट ४९ सेकेन्ड समयका साथ एपिएफकी आशा राउत तेस्रो भइन् । म्याराथनका महिला र पुरुषतर्फ दुवै विजेताले उपाधिसहित २५ हजार, दोस्रोले १५ हजार, तेस्रोले १० हजार तथा चौथो र पाँचौंले समान ५ हजार रुपैयाँ प्राप्त गरे ।

म्याराथन काठमाण्डौ क्षेत्र नं. ४ गोल्फुटारस्थित बास्केटबल कोर्टबाट सुरु हुँदै धुम्बाराही चोक, चावहिल, गौशाला, रातोपुल, ज्ञानेश्वर, कमलपोखरी, जयनेपाल हल, दरवारमार्ग, केशरमहल, लैनचौर, लाजिम्पाट, पानीपोखरी, नारायणगोपाल चोक, बुढानिलकण्ठ प्रहरी बिट हुँदै पुनः सोहिस्थानमा पुगेर टुंगिएको थियो ।

बागमती प्रदेशले पूर्व प्रधानमन्त्री एवं नेपाली कांग्रेसका नेता स्वर्गिय कृष्ण प्रसाद भट्टराई (किसुनजी) को नाममा पहिलो पटक यो प्रतियोगिता आयोजना गरेको हो । नेपाली राजनीति र नेपाली खेलकुदको क्षेत्रमा किसुनजीको योगदानलाई स्मरण गर्दै प्रतियोगिता आयोजना गर्न लागिएको प्रदेशका संयोजक दीपक गुरुङले जनाएका छन् ।

भट्टराई प्रधानमन्त्री हुँदा नेपालले काठमाडौंमा आठौं साग आयोजना गरेको थियो । त्यति बेला नेपाल पहिलो पटक पदक तालिकाको दोस्रो स्थानमा रहन सफल भएको थियो । गत वर्ष स्वदेशमा आयोजना भएको १३ औं सागमा पनि नेपाल पदक तालिकाको दोस्रो स्थानमा रहेको थियो ।