काठमाडौं (हाम्रो खेलकुद) – कास्की बास्केटबल संघ लिनिङ थ्री बाई थ्री वेष्ट पोखराको च्याम्पियन बनेको छ । पोखरा रंगशालास्थित बास्केटबल कोर्टमा भएको उपाधि भिडन्तमा रामघाट बौद्ध शान्ति क्लबलाई १६–१४ ले हराउँदै कास्की च्याम्पियन बनेको हो ।

यद्यपि फाइनलमा पुगेका दुवै टोलीले अब धनगढीमा हुने थ्री बाई थ्री वेस्ट प्रतियोगिताको फाइनलमा प्रतिस्पर्धा गर्नेछन् । नेपाल बास्केटबल लिगको आयोजनामा भइरहेको थ्रि बाई थ्रि वेष्ट अन्तर्गत पोखरापछि अब बुटवल र धनगढीमा पनि प्रतियोगिता हुनेछ । बुटवल लेग माघ ४ गते हुनेछ भने धनगढी लेग माघ ६ गते आयोजाना हुनेछ ।

पोखरामा सहभागि टोलीहरुलाई डबल एलिभिनेसन राउण्डमा खेलाइएको थियो । योङ ब्रदर्श र एलसी ब्रदर्श सेमिफाइनल पुग्ने अन्य दुई टोली रहेका थिए । सेमिफाइनलमा कास्कीले योङ ब्रदर्शलाई २१–१७ र रामघाटले एलसी ब्रदर्शलाई १७–१५ ले पराजित गरेका थिए । प्रतियोगितामा कुल १२ टोलीको सहभागिता रहेको थियो । सहभागी टोलीलाई दुई पुलमा विभाजन गरिएको थियो ।

हरेक शहरबाट फाइनल पुग्ने दुई–दुई टोली माघ ८ र ९ गते हुने थ्री बाई थ्री वेस्ट फाइनलमा भिड्नेछन् । फाइनलको विजेता र उपविजेताले ५० हजार र २५ हजार रुपैयाँ पुरस्कार प्राप्त गर्नेछन् ।

यसअघि आयोजक नेपाल बास्केटबल लिग प्रालिले एनबिएल इस्टको पनि आयोजना गरेको थियो । वेस्ट प्रतियोगिता समापनपछि एनबिएलले सेन्ट्रलको पनि आयोजना गर्नेछ ।