काठमाडौं (हाम्रो खेलकुद) – पाँचौं यु–१८ राष्ट्रिय पुरुष बास्केटबल प्रतियोगिताको फाइनलमा जेभियर इन्टरनेसनललाई पराजित गर्दै व्हाइटहाउस च्याम्पियन बनेको छ ।

बिहिबार त्रिपुरेश्वरस्थित राष्ट्रिय खेलकुद परिषद्को कभर्डहलमा भएको फाइनलमा ह्वाइटहाउसले जेभियर इन्टरनेसनललाई ५६–४५ ले पराजित गर्यो । ह्वाइटहाउसलाई उपाधि दिलाउने क्रममा सुरज खत्रीले एक्लैले २३ अंक जोडेका थिए । पराजित जेभियरका लागि सगर तामाङले २६ अंक जोडे ।

पहिलो क्वाटरमा १०–८ को अह्रता लिएको व्हाइटहाउसले दोश्रो क्वाटर १४–१२ ले आफ्नो पक्षमा पार्यो । तेस्रो क्वाटरमा २०–७ को अग्रता लिएपछि जित सुनिश्चित पारेको व्हाइटहाउस चौथोमा सेटमा भने १८–१२ ले पछि पर्यो । विजेता ह्वाइटहाउसका विशाल मोक्तान प्रतियोगिताको ‘मोस्ट भेलुएबल प्लेयर’ घोषित भए ।

नेपाल बास्केटबल संघद्वारा आयोजित प्रतियोगितामा समृद्धिले तेश्रो स्थानमा चित्त बुझायो । समृद्धिले न्यु जेनिथलाई ७८–६९ ले हरायो । समृद्धिका सोमित गुरुङले २० स्कोर गरे । विजेतालाई नेपाल ओलम्पिक कमिटीका अध्यक्ष जीवनराम श्रेष्ठलगायतले एक कार्यक्रमबीच पुरस्कृत गरे । फागुन १ गतेदेखि सुरु प्रतियोगितामा १२ टिमले लिग कम नकआउट आधारमा प्रतिस्पर्धा गरेका थिए ।

यसै प्रतियोगितामा गरेको प्रदर्शनका आधारमा बंगलादेशमा जुन–जुलाईमा हुने साबा यु–१८ पुरुष बास्केटबल च्याम्पियनसिपका लागि नेपाली टोलीको चयन गरिने छ ।