एजेन्सी – यूईएफए च्याम्पियन्स लिग अन्तर्गत बायर्न म्युनिख र बार्सिलोनाबीच क्वाटरफाइनल चरण अन्तर्गतको तेस्रो खेल केहीबेरमा सुरु हुँदैछ ।

खेलको लागि सुरुवाती रोजाईको घोषणा हुँदा बार्सिलोनाले अघिल्लो खेलबाट दुई खेलाडी परिवर्तन गरेको छ । अघिल्लो खेलमा नेपोलीविरुद्ध जित हासिल गर्दा प्रतिबन्धमा रहेका सर्जियो बुस्केट्ससँगै आर्टुरो भिडालले पहिलो रोजाईमा पुनरागमन गरेका छन् । यी दुईसँगै सर्जी रोबर्टो र फ्रेन्की डे जोङले बार्सिलोनाको मिडफिल्ड जिम्मेवारी सम्हाल्नेछन् ।

आक्रमणमा कप्तान लिओनेल मेस्सी र लुइस सुआरेज रहेका छन् । एन्टोइन ग्रिजमन भने बेन्चमा रहेका छन् । डिफेन्समा क्लेमेन्ट लेङलेट र जेरार्ड पिकेसँगै नेल्सन सेमेडो र जोर्डी अल्बा रहेका छन् । गोलरक्षकमा जर्मनीका मार्क आन्दर टेर स्टेगनले नै निरन्तरता पाएका छन् । फ्रान्सेली विंगर ओस्मान डेम्बेलेको नाम पनि बेन्चमा रहेको छ ।

यता बायर्नले चेल्सीविरुद्ध ४-१ को जित हासिल गर्दा खेलाएको टोलीलाई नै पहिलो रोजाईमा उतारेको छ । यससँगै बार्सिलोनाबाट लोनमा आएका मिडफिल्डर फिलिपे कोउटिन्होले पहिलो रोजाइमा स्थान बनाउन सकेनन् । बायर्नका कप्तान म्यानुएल नोएर गोलरक्षकमा छन् । डिफेन्समा जोशुआ किम्मिच, जेरोम बोटेङ, डेविड अलावा र अल्फोन्सो डेभिसले खेल्दैछन् ।

मिडफिल्डमा बार्सिलोनाको एकेडेमीमै हुर्केका थियागो अलाकान्तारा छन् । उनलाई लिओन गोरेट्जका र थोमस मुलरले साथ दिनेछन् । आक्रमणमा रोबर्ट लेवान्डोस्की एकल फरवार्डका रुपमा छन् । विंगरद्वय सर्ज जिनाब्री र इभान पेरिसिचले लेवान्डोस्कीलाई साथ दिनेछन् ।

बार्सिलोना लगातार १३ औं सिजन च्याम्पियन्स लिगको क्वाटरफाइनल पुग्ने एक्लो टोली बनेको छ । तर टोलीले प्रतियोगितामा सर्वाधिक हार बेहोरेको टोली पनि बायर्न नै हो । हालसम्म बायर्नले बार्सिलोनासँग खेलेको ८ मध्य ५ खेलमा जित हासिल गरेको छ । बार्सिलोनाले च्याम्पियन्स लिगको पछिल्लो ३१ खेलमा २ खेल मात्र हारेको छ । बार्सिलोनासँगै बायर्न म्युनिख र म्यानचेस्टर सिटी यस सिजनको अपराजित टोली हुन् ।

यो पनि पढ्नुहोस :

बायर्न विरुद्ध बार्सिलोना : नजर उत्कृष्ट फरवार्डमा

मेस्सी विरुद्ध लेवान्डोस्की : यस्तो छ करिअर तथ्यांक

सेमिफाइनल पुग्न बार्सिलोना र बायर्न भिड्दै