मस्कट (हाम्रो खेलकुद) – नेपालले आइसिसी टि२० विश्वकप ग्लोबल छनोट ए अन्तर्गत आज दोस्रो खेलमा फिलिपिन्सविरुद्ध पहिला ब्याटिङ गर्ने भएको छ ।

ओमान क्रिकेट एकेडेमी ग्राउन्ड–२ भएको टसमा फिलिपिन्सका कप्तान जोनाथन हिलले टस जितेर पहिला फिल्डिङ गर्ने निर्णय लिएका हुन् ।नेपालले आजको खेलमा दुई खेलाडी परिवर्तन गरेको छ । नेपालले तीव्र गतिका बलर गुलशन झाई टि२० आईमा डेब्यू दिएको छ । घाइते शरद भेषावकरको स्थानमा कुशल मल्ललाई खेलाएको छ ।

कुशललाई विवेक यादवको स्थानमा मौका दिएको हो । कमल सिंह ऐरी र विवेक यादवलाई विश्राम दिदा कुशल मल्ल र गुलशन झालाई खेलाएको छ । फिलिपिन्स पहिलो खेलमा क्यानडासँग १ सय १८ रनको फराकिलो अन्तरले पराजित भएको थियो । नेपालले घरेलु टोली ओमानलाई ३९ रनले हराएको थियो ।

नेपालले प्रस्तुत गरेको ओमान १७ ओभरमा ७८ रनमा अल आउट भएको थियो । नेपालको मनोबल आजको खेलमा उच्च हुनेछ । फिलिपिन्सविरुद्ध पहिला ब्याटिङ गरेको क्यानडाले २० ओभरमा १ विकेट गुमाउँदै २ सय १६ रन बनाएको थियो । उक्त लक्ष्य पछ्याएको फिलिपिन्सले निर्धारित २० ओभरमा ५ विकेट गुमाउँदै ९८ रन बनाएको थियो ।

फिलिपिन्स नेपाल भन्दा तुलनात्मक रुपमा धेरै कमजोर टोली हो । त्यसैले नेपाललाई कीर्तिमानको वर्षात बनाउने अवसर हुनेछ । नेपालसँग आजको खेलमा फिलिपिन्सविरुद्ध थुप्रै राष्ट्रिय तथा विश्व कीर्तिमान बनाउने अवसर हुनेछ । नेपालले यस खेलमा नेटरनरेट बढाउन ध्यान दिनुपर्ने हुन्छ ।

आजनै हुने समूह बी को अर्को खेलमा ओमान क्यानडासँग पराजित भएमा नेपाल औपचारिक रुपमा एक खेल अगावै सेमिफाइनलमा पुग्नेछ । यदि ओमानले क्यानडलाई हराएको खण्डमा भने नेपालले अन्तिम पर्खनु पर्ने हुन्छ । नेपालले सोमबार क्यानडासँग खेल्नेछ । पहिलो खेलमा ओमानलाई हराएपछि नेपालको सम्भावना उच्च भएको छ ।

नेपालले फिलिपिन्ससँग पहिलो पटक खेल्न लागेको हो । चार दिनको तयारीको साथ विश्वकप छनोट खेल्न आएको फिलिपिन्स नेपालसँगको खेलमा जित भन्दा सिक्न बढी चाहनेछ । फिलिपिन्सका ड्यानियल स्मिथ, विमल कुमार र कपिल कुमार प्रमुख ब्याटर हुन् ।

समूह ए मा आयरल्यान्ड, युएई, बहरान र जमर्नी छन् । पहिलो दिन आयरल्यान्ड युएईसँग १८ रनले पराजित भयो । बहराइनले जमर्नीलाई ६ विकेटले हराएको थियो । आजनै जमर्नीविरुद्ध युएई तथा आयरल्यान्डविरुद्ध बहराइन दिउँसो ३ः४५ मा सुरु हुनेछ ।

फिलिपिन्सविरुद्ध नेपालको प्लेइङ ११ :

आसिफ शेख (विकेटकिपर), कुशल भुर्तेल, ज्ञानेन्द्र मल्ल, दीपेन्द्रसिंह ऐरी, आरिफ शेख, लोकेश बम, जितेन्द्र मुखिया, कुशल मल्ल, गुलशन झा, अभिनाश बोहरा र सन्दीप लामिछाने (कप्तान) ।

यो पनि : नेपाललाई फिलिपिन्समाथि कीर्तिमानको वर्षात गराउने अवसर

क्यानाडाले ओमानलाई हराए नेपाल सेमिफाइनल पुग्ने समिकरण