एजेन्सी – भारतले पहिलो टि२० आई खेलमा श्रीलंकामाथि ६२ रनको सहज जित हात पारेको छ । योसँगै तीन टि२० आई खेलको सिरिजमा भारतले १–० को अग्रता लिएको छ ।

२ सय रनको विशाल विजयी लक्ष्य पछ्याएको श्रीलंकाले निर्धारित २० ओभरमा ६ विकेट गुमाउँदै १ सय ३७ रन बनायो । श्रीलंका मध्यक्रमका चरिथ असंलका ४७ बलमा सर्वाधिक ५३ रनमा अविजित रहे । दुश्मन्था चामिराले १४ बलमा २ चौका र १ छक्कासहित २४ रन बनाए । चामिका करुणारत्ने २१, दासुन शनका ३ र दीनेश चान्डिमल १० रनमा आउट भए ।

भारतका भुवनेश्वर कुमारले २ ओभरमा ९ रन खर्चेर २ विकेट लिए । वेंकटेश ऐर ३ ओभरमा ३६ रन खर्चेर २ विकेट लिए । युजभेन्द्र चहल र रविन्द्र जडेजाको नाममा १–१ विकेट रह्यो ।

त्यसअघि लखनऊमा टस हारेर ब्याटिङको निम्तो पाएको भारतले निर्धारित २० ओभरमा २ विकेट गुमाउँदै १ सय ९९ रन बनाएको थियो । भारतका ईशान किशनले ५६ बलमा १० चौका र ३ छक्कासहित सर्वाधिक ८९ रनको उत्कृष्ट ब्याटिङ गरे । किशनको यो टि२० आई करिअरको उच्च प्रदर्शन समेत हो । अर्का युवा ब्याटर श्रेयस ऐर २८ बलमा ५ चौका र २ छक्कासहित ५७ रनमा अविजित रहे ।

ओपनर रोहित शर्मा र किशनले पहिलो विकेटका लागि ११.५ ओभरमा १ सय ११ रनको शतकीय साझेदारीको साथ उत्कृष्ट सुरुवात दिलाए । रोहितलाई लाहिरु कुमाराले ४४ रनमा बोल्ड आउट गरे । बोल्ड हुनुअघि रोहितले ३२ बलमा २ चौका र १ छक्का प्रहार गरे ।

किशन कप्तान दासुन शनकाको १७ औं ओभरको अन्तिम बलमा ठूलो सट खेल्नेक्रममा जनिथ लियानागेबाट क्याच भएपछि शतक बनाउन ११ रनले चुकेका थिए । रविन्द्र जडेजा ३ रनमा अविजित रहे । श्रीलंका लाहिरु कुमारा र दासुन शनकाले १–१ विकेट लिए । दोस्रो टि२० आई खेल धर्मशालामा शनिबार हुनेछ ।