एजेन्सी – ओपनर तथा विकेटकिपर जस बटलरको उत्कृष्ट शतकमा राजस्थान रोयल्सले इन्डियन प्रिमियर लिग (आइपिएल) २०२२ मा मुम्बई इन्डियन्सलाई १ सय ९४ रनको विशाल लक्ष्य दिएको छ ।

डिवाई पाटिल स्पोर्ट्स एकेडेमी मुम्बईमा टस हारेर पहिला ब्याटिङको निम्तो पाएको राजस्थानले निर्धारित २० ओभरमा ८ विकेट गुमाउँदै १ सय ९३ रन बनायो । बटलरले ६८ बलमा ११ चौका र ५ छक्कासहित १ सय रनको शतकीय इनिङ खेले । बटलरले ६६ बलमा शतक पूरा गरेका थिए । आइपिएलमा बटलरको दोस्रो शतक हो ।

यसअघि बटलरले २०२१ मा बटलरले सनराइजर्स हैदराबादविरुद्ध ६४ बलमा ११ चौका र ८ छक्कासहित १ सय २४ रनको सानदार इनिङ खेलेका थिए । ओपनर यशस्वी जैसवाल १ र देवदत्त पाडिक्कल ७ रनमा आउट भएका थिए । तर तेस्रो विकेटका लागि कप्तान सन्जु स्यामसन र बटलरले ८२ रनको साझेदारी गरेका थिए ।

स्यामसन २१ बलमा १ चौका र ३ छक्कासहित ३० रनमा क्याच आउट भए । उनी पोलार्डको बलमा तिलक बर्माबाट क्याच भए । शिम्रन हेटमायरले १४ बलमा ३ चौका र ३ छक्कासहित ३५ रनको विष्फोटक इनिङ खेल्दै विशाल योगफलमा पुर्याए । हेटमायर जस्प्रित बुमराहको बलमा तिलक बर्माबाट क्याच भए । बटलरलाई बुमराहले १९ औं ओभरको तेस्रो बलमा बोल्ड आउट गरे ।

मुम्बईका जस्प्रित बुमराहले ४ ओभरमा १७ रन खर्चेर ३ विकेट लिए । टाइमल मिल्सले ४ ओभरमा ३५ रन खर्चेर ३ विकेट लिए ।