काठमाडौं (हाम्रो खेलकुद) – ओपनर विरनदीप सिंहको अर्धशतकमा मलेसिया–११ ले भैरहवामा जारी प्रो क्लब च्याम्पियनसिपमा घरेलु टोली रुपन्देही ११ लाई १ सय ३२ रनको मध्यम लक्ष्य दिएको छ ।

सिद्धार्थ रंगशाला भैरहवामा टस जितेर पहिला ब्याटिङ थालेको मलेसिया ११ ले १९.५ ओभरमा १ सय ३१ रनमा अल आउट भयो । मलेसियाका ओपनर विरनदीप सिंहले ६३ बलमा ७ चौका र १ छक्कासहित सर्वाधिक ६६ रन बनाए ।

सैद अजिजले २१ बलमा ४ चौका सहित २५ रन जोडे । ओपनर जुबैदी जुल्किफ्लिी र कप्तान अहमद फैज १–१ रनमा आउट भएका थिए । जुबैदी स्पिनर अनिल खरेल र फैज कप्तान कृष्ण कार्कीको बलमा बोल्ड भए ।

बायाँ हाते स्पिनर बशिर अहमदले एनुल हफिज र सैद अजिजलाई आउट गरे । दुर्गेश गुप्ताले मोहम्मद आमिरलाई १ रनमा बोल्ड आउट गरे । तल्लोक्रमका शार्विन मुनीआन्दीले १५ बलमा ३ चौका र १ छक्कासहित २८ रन जोडे । मलेसिया ८ खेलाडीले दोहोरो अंकमा रन बनाउन सकेनन् ।

रुपन्देहीका बशिर अहमदले ४ ओभरमा १७ रन खर्चेर २ विकेट लिए । कप्तान कृष्ण कार्कीले ३.५ ओभरमा १५ रन खर्चेर ३ विकेट लिए । अनिल खरेल, दुर्गेश गुप्ता र विक्रम भुषालले १–१ विकेट लिए ।

यसै साता नेपाल र पपुवा न्युगिनीसँग त्रिकोणात्मक टि२० आई सिरिज खेलेको मलेसिया टोली नै भैरहवा गएको हो । आजको दोस्रो खेलमा नेपाल पुलिस क्लब र पुश स्र्पोर्ट्स दिल्लीबीच प्रतिस्पर्धा हुनेछ ।